महासमितिबारे निर्णय लिन कांग्रेसले बोलायो कार्यसम्पादन समितिको बैठक

२५ मंसिर, काठमाडौं । महासमितिको बैठकबारे अनिश्चितता बढिरहेका बेला नेपाली कांग्रेसका सभापति शेरबहादुर देउवाले केन्द्रीय कार्यसम्पादन समितिको बैठक बोलाएका छन् । सभापति देउवाले यही मंसिर २९ गते शुक्रबार दिउँसो बस्ने गरी बैठक बोलाएका हुन् ।

कांग्रेसका मुख्यसचिव कृष्णप्रसाद पौडेलले सोमबार विज्ञप्ति जारी गर्दै सानेपास्थित पार्टी केन्द्रीय कार्यालयमा बस्ने गरी बैठक बोलाइएको जानकारी दिए । बैठकका खास एजेण्डा राखिएको छैन् । पौडेलका अनुसार महासमिति बैठकको तयारी, जाजरकोट भूकम्प र समसामयिक राजनीतिक विषयमा बैठकमा छलफल हुनेछ । 

आउँदो पुस १६ देखि १९ गतेसम्म हुने भनिएको पार्टीको महासमिति बैठक सार्ने तयारी गरिएको छ । शुक्रबारको बैठकबाट उक्त निर्णय गर्ने तयारी गरिएको एक पदाधिकारीले बताए । महासमितिको बैठकबारे छलफल गर्न मंगलबार नेता शेखर कोइराला समूहको पनि बैठक डाकिएको छ ।