अघिल्लो हप्ता आकासिएको सुनको मूल्य लगातार घट्दै

२६ मंसिर, काठमाडौं । अघिल्लो हप्ता आकासिएको सुनको मूल्य लगातार घटिरहेको छ ।  नेपाल सुनचाँदी व्यवसायी महासङ्घले आज सार्वजनिक गरेको मूल्यसूची अनुसार तेस्रो दिन पनि सुनको मूल्य घटेको छ।महासंघका अनुसार आज सुनको मूल्य तोलामा नै ७०० रूपैयाँले घटेको जनाएको छ ।

जसअनुसार आज छापावाल सुनको मूल्य तोलामा १ लाख १६ हजार ३०० र तेजाबी सुनको मूल्य तोलामा १ लाख १५ हजार ७५० रूपैयाँ कायम भएको छ ।  सोमबार मात्रै छापावाल सुनको मूल्य तोलामा १ लाख १७ हजार रूपैयाँ र तेजाबी सुनको मूल्य तोलामा १ लाख १६ हजार ४५० रूपैयाँमा कारोबार भएको थियो ।

गत हप्ताको अन्तिम शुक्रबारको तुलनामा आइतबार मात्रै एकैदिन १३ सय रूपैयाँले मूल्य घटेर कारोबार गरेको थियो  । सुनको मूल्य लगातार तेस्रो दिन गिरावट आए पनि चाँदीको मूल्य भने स्थिर रहेको छ । जसअनुसार आज चाँदीको मूल्य तोलामा १४ सय १० रूपैयाँ कायम भएको ।