टिकटक प्रतिबन्धविरुद्धको रिटमाथि सुनुवाइको सम्भावना न्यून

२७ मंसिर, काठमाडौं । सरकारले टिकटकमाथि लगाएको प्रतिबन्धविरुद्ध दायर रिट न्यायाधीशद्वय प्रकाशकुमार ढुङ्गाना र तिलप्रसाद श्रेष्ठको इजलासमा परेको छ । अधिवक्ता अनन्तराज लुइटेल, फर्सुराम पाण्डे, वरिष्ठ अधिवक्ता दिनेश त्रिपाठी लगायतले सरकारको निर्णय उत्प्रेषणको आदेशले बदर गर्न माग गर्दै सर्वोच्चमा रिट दर्ता गराएका थिए । 
 
ती रिटहरूमाथि मंसिर ५ गते विपक्षी नेपाल सरकार, नेपाल दूरसञ्चार प्राधिकरण लगायतको नाममा कारण देखाऊ आदेश जारी भए पनि अन्तरिम आदेश दिन अस्वीकार गरेको थियो । मंसिर १९ गतेको पेशी तोकिएकामा उक्त दिन हेर्न नभ्याउनेमा परेको थियो । 

त्यसपछि बुधबारका लागि न्यायाधीशद्वय ढुङ्गाना र श्रेष्ठको इजलासमा पेसी तोकिएको भए पनि उक्त रिट अन्तिममा रहेको कारण बुधबार पनि हेर्न नभ्याउनेमा पर्ने सम्भावना बढी छ । टिकटक प्रतिबन्धविरुद्ध १४ जनाले सर्वोच्च अदालतमा रिट दर्ता गराएका छन् । तर, आज सुनुवाको सम्भावना कम रहेको सर्वोच्च प्रशासनले जनाएको छ ।