नेपालमा भएको अवसर छाडेर विदेशमा हन्डर खाइरहेका छन नेपाली युवाः प्रधानमन्त्री

२७ मंसिर, काठमाडौं । प्रधानमन्त्री पुष्पकमल दाहाल प्रचण्डले नेपालमा केही अवसरै छैन भनेर अनाहकमा नेपाली युवाहरूले विदेश गएर हन्डर खाइरहेको टिप्पणी गरेका छन् । काठमाडौं विश्वविद्यालयको २९ औं दीक्षान्त समारोहलाई बुधबार धुलिखेलमा सम्बोधन गर्दै प्रधानमन्त्री प्रचण्डले नेपालमै भएका शिक्षार र अवसरलाई प्रयोग गर्ने अपिल गरे ।

 उनले नेपालमा भएका अवसरलाई वेवास्ता गरी विदेश जाने काम भएकाले उता उनिहरुले हण्डर खाने र यता, त्यसबाट सरकारलाई समस्यामा पार्ने काम भइरहेको बताए । विदेशमा नेपाली युवा समस्यामा पर्दा त्यसको असर सरकारमा पनि पर्ने उनले बताए । रुसमा पुगेका नेपाली युवाको समस्या सुल्झाउन अहिले कठिन भएको प्रधानमन्त्रीको भनाइ छ ।   

प्रधानमन्त्री प्रचण्डले नेपालको अहिले नेपालमा अवसर छैन भन्ने भाष्य निर्माण भएकाले नेपाली युवा विदेशमा अनेक हन्डर खाइरहेको बताए । रुसी सेनामा दुई सयभन्दा धेरै नेपालीहरु भर्ना भएको विषय चिन्ताजनक भएको उनको भनाइ थियो ।  अहिले विभिन्न बाध्यताका कारण २०० भन्दा बढी नेपाली युवाहरू रुसी सेनामा भर्ना भएको जुन खबर आएको छ, त्यो चिन्ताजनक छ र सरकार तिनलाई सकुशल फिर्ता ल्याउन हरसम्भव प्रयास गरिरहेको छ, उनले भने । 

उनले नेपालमै प्रशस्त शिक्षा तथा रोजगारीका अवसर रहेको उल्लेख गर्दै तिनको उचित व्यवस्थापन गर्न सके व्यक्तिगत जीवनको मात्र नभएर देशहितको पनि काम गर्न सकिने उनको भनाइ छ । उच्च शिक्षाको सुधार र अन्तर्राष्ट्रियकरणको सवाललाई सरकारले गम्भीरतापूर्वक लिएको बताए। नीतिगत र व्यावहारिक सुधारका कुरालाई राष्ट्रिय शिक्षा नीतिमा समायोजन गर्ने हरसम्भव प्रयास रहेको बताए ।’

प्रधानमन्त्रीले काठमाडौं विश्वविद्यालयबाट अहिलेसम्म दीक्षित हुनेमध्ये १२ प्रतिशत विदेशी विद्यार्थी रहनु नेपालको शैक्षिक अन्तर्राष्ट्रियकरणको ज्वलन्त उदाहरण भएको दाबी गरे । उनले अब यो शैक्षिक अन्तर्राष्ट्रियकरणको अभियानलाई थप सुदृढ र विस्तारित बनाउने उल्लेख गरे । उनले नेपालका अन्य विश्वविद्यालयबाट अध्ययन गरेर थप अध्ययन र अनुभवका लागि विदेश गएकाहरुलाई पनि ज्ञान र सीप नेपालको दिगो विकासका लागि सदुपयोग गर्न अनुरोध गरेका छन् ।