चुनाव हारेकालाई किन राष्ट्रियसभा ?

२७ मंसिर, काठमाडौं । नेपाली कांग्रेसका नेता गुरुराज घिमिरेले चुनाव हारेकाहरुलाई राष्ट्रियसभामा लैजान नहुने बताएका छन् । बुधबार कांग्रेसको शेखर पक्षको भेलामा उनले ११ माघमा हुने राष्ट्रियसभा निर्वाचनमा उम्मेदवार चयनका लागि पार्टीले मापदण्ड बनाउनुपर्ने बताए ।

राष्ट्रियसभा चुनावमा कांग्रेसबाट कृष्णप्रसाद सिटौला र गोपालमान श्रेष्ठ उम्मेदवार बन्ने चर्चा छ । उनीहरुप्रति लक्षित गर्दै घिमिरेले चुनाव हारेकाहरुलाई राष्ट्रियसभामा लैजान नहुने बताए । गत वर्ष भएको आम निर्वाचनमा सिटौला झापा–३ मा पराजित भएका थिए भने श्रेष्ठ समानुपातिक पद्धतिको उम्मेदवार सूचीमा भए पनि सांसद चयन हुन सकेका थिएनन् ।

बुधबार शेखर गगन पक्षको भेलामा नेता घिमिरेले मुख्यमन्त्रीले दुई महिनासम्म मन्त्रिपरिषद विस्तार गर्न नसक्ने तर महामन्त्रीबारे टिप्पणी गर्न नसुहाउने बताए । ‘आफू मुख्यमन्त्री भएको दुई महिनासम्म मन्त्रिपरिषद बनाउन नसक्ने ? हामीलाई सुशासन सिकाउन सुहाउँछ ? मुख्यमन्त्री बनाएको महामन्त्रीलाई गाली गर्न हो ?’ घिमिरेले प्रश्न गरे ।