शेखरलाई संसदीय दलको नेता बनाउन गगनको प्रस्ताव

२७ मंसिर, काठमाडौं ।  नेपाली कांग्रेसका महामन्त्री गगन थापाले जतिसक्दो छिटो नेता शेखर कोइरालाई संसदीय दलको नेता बनाउनुपर्ने प्रस्ताव गरेका छन् । आज बसेको संस्थापनइतरको बैठकमा उनले कोइरालालाई दलको नेता नबनाए ०८२ मा महाधिवेशन हुनै नसक्ने जिकिर गरे । 

उनले भने, ‘संसदीय दलको नेता फेर्नुपर्छ । संसदीय दलको नेता नफेरेसम्म ०८२ मा महाधिवेशन हुँदैन । संसदीय दलको नेता बन्नुपर्छ भन्ने छैन । शेखर कोइरालाई नै संसदीय दलको नेता बनाउनेतिर लागौँ ।’ अब जतिसक्दो छिटो शेखर कोइरालालाई संसदीय दलको नेता बनाउनतिर लाग्नुपर्ने उनको भनाइ छ । उनले आफू समूहमा बफादार रहेको पनि बताएका छन् । 

समूहप्रति पूर्ण बफादार छु र शेखर दाइलाई नेता मान्ने र बनाउने कुरामा म जस्तो त्याग गर्न तयार छु, उनले बैठकमा भने, म र शेखर दाइको बीचमा कुनै मनमुटाव छैन भनेर कति भन्ने ? साथीहरूले धेरै खेल्दिनुभएन । 

आजको कांग्रेसको संस्थापनइतर पक्षको बैठक सकिएको छ । सभापति शेरबहादुर देउवालाई विधानको पालना गर्दै अघि बढ्न दबाब बढाउने निष्कर्षसहित बैठक सकिएको हो । बैठकमा सामूहिक निर्णयमार्फत सभापति देउवालाई ठिक बाटोमा हिँडाउने र महासमितिसहित महाधिवेशन समयमा गर्न लागि पर्ने निर्णय भए पनि धेरै समय नेता शेखर कोइराला र गगन थापाको सम्बन्धनको विषयले लियो । 

त्यही विषयमा मिडियाले चासो राखेपछि नेता कोइरालाले आफूहरूबीच मुद्दामा मतभेद नरहेको तर कार्यशैलीमा भने फरक रहेको स्वीकार गरे । एजेन्डामा महामन्त्री र मेराबीच केही पनि फरक छैन, कोइरालाले भने, “गगनजीको र मेरो उमेरमा फरक छ । यसकारण स्टाइल अफ फङ्सनिङ फरक पर्छ, त्यो स्वाभाविक हो ।” त्यसबाहेका कुनै समस्या नरहेको जिकिर उनले गरे ।