भ्रष्टाचारविरुद्ध राजधानीमा नेविसंघको प्रदर्शन

२८ मंसिर, काठमाडौं । नेपाली कांग्रेसको विद्यार्थी संगठन नेपाल विद्यार्थी संघ (नेविसंघ)ले भ्रष्टाचारविरुद्ध प्रदर्शन गरेको छ । एकपछि अर्को  बाहिर आएको भ्रष्टाचार प्रकरण र एनसेल बिक्रीविरूद्ध नेविसंघले प्रदर्शन गरेको हो । बिहीबार बिहान पद्मकन्या बहुमुखी क्याम्पसमा विद्यार्थीहरूले एनसेल बिक्रीमा भएको अनियमितता छानबिनको माग गर्दै प्रदर्शन गरे । 

कर छलेर मलेसियन कम्पनी आजियाटा एनसेलबाट बाहिरिएको भन्दै नेविसंघले विरोध जनाएको हो । प्रदर्शनको क्रममा विद्यार्थीहरूले मास्क लगाएका थिए भने विभिन्न माग उल्लिखित पम्प्लेटहरू बोकेका थिए ।  गत मंसिर १५ गते आजियाटाले एनसेलबाट बाहिरिने निर्णय गरेको थियो। आजियाटा बाहिरिएपछि स्पेक्ट्रलाइट युके लिमिटेडले   एनसेलको ८० प्रतिशत सेयर किन्ने सम्झौता गरेको थियो ।

विभिन्न राजनीतिक दलका नेताहरूले पनि एनसेल बिक्रीमा ठूलो अनियमितता भएको बताउँदै आएका छन्। सरकारले पनि यसमा छानबिन गर्न निर्देशन दिइसकेको छ । एकपछि अर्को भ्रष्टाचार प्रकरण बाहिर आएको भन्दै नेविसंघले आज प्रदर्शन गरेको हो ।

पछिल्लो समय एनसेल प्रकरण बाहिर आएको र त्यसको छानबिन समिति औपचारिकतामा सीमित भएको बताउँदै नेविसंघले खबरदारी गरेको छ । नेविसंघले कांग्रेस सरकारमै भएका बेला भ्रष्टाचार प्रकरण बाहिर आएको भन्दै नेतृत्वमाथि प्रश्नसमेत गरेको छ ।