आजबाट सर्वोच्चमा प्रस्तावित न्यायाधीशहरुको सुनुवाइ

२९ मंसिर, काठमाडौं । संसदीय सुनुवाइ समितिले आजबाट सर्वोच्च अदालतका प्रस्तावित न्यायाधीशहरुको सुनुवाइ गर्दैछ । बिहान ११ बजे सिंहदरबारस्थित बस्ने बैठकले सुनुवाइ गर्न लागेको हो । सर्वोच्च अदालतका प्रस्तावित न्यायाधीशहरुको सुनुवाइ मंसिर २९ गते गर्ने निर्णय समितिले गरेको थियो । 

सर्वोच्चमा प्रस्तावित ६ जना न्यायाधीशविरुद्ध १० जना व्यक्तिले उजुरी दिएका थिए । समितिले उजुरीकर्तासँग उनीहरुले उजुरीमा उठाएका विषयमा छलफल गरिसकेको छ । 

न्यायपरिषदको मंसिर ५ गते बसेको बैठकले सर्वोच्च अदालतको न्यायाधीशमा सारंगा सुवेदी, अब्दुल अजिज मुसलमान, महेश शर्मा पौड्याल, टेकप्रसाद ढुंगाना, सुनिल पोखरेल र बालकृष्ण ढकालको नाम सिफारिस गरेको थियो ।

उनीहरुको संसदीय सुनुवाइ समितिबाट नाम अनुमोदन भएपछि मात्र नियुक्ति हुने संवैधानिक व्यवस्था छ । आज सर्वोच्च अदालतका प्रस्तावित न्यायाधीशद्वय सारंगा सुवेदी र अब्दुल अजीज मुसलमानको बैठकमा सुनुवाइ हुने कार्यसूची रहेको संसद् सचिवालयका सचिव पदप्रसाद पाण्डेयले जानकारी दिए । संसदीय सुनुवाइ समितिबाट नाम अनुमोदन भएमा उनीहरूको नियुक्ति हुनेछ ।