कांग्रेस कार्यसम्पादन समितिको बैठक आज, महासमिति र राष्ट्रियसभा मुख्य एजेण्डा

२९ मंसिर, काठमाडौं । नेपाली कांग्रेसका सभापति शेरबहादुर देउवाले शुक्रबार केन्द्रीय कार्यसम्पादन समितिको बैठक बोलाएका छन् । सभापति देउवाले राष्ट्रियसभा सदस्य निर्वाचनको तयारी र महासमितिको बैठकको मिति सार्ने सम्बन्धमा छलफल गर्न बैठक बोलाएका हुन् । 

बैठक शुक्रबार दिउँसो १२ः१५ बजे सानेपास्थित कांग्रेस मुख्यालयमा बस्नेछ । कांग्रेसका कार्यालयका मुख्यसचिव कृष्णप्रसाद पौडेलले बैठकमा राष्ट्रियसभा सदस्य निर्वाचनको तयारीका विषयमा छलफल हुने जानकारी दिए ।

बैठकमा जाजरकोट भूकम्प र पार्टीको महासमिति बैठकको तयारीका विषयमा समेत छलफल गर्ने गरी एजेन्डा तय गरिएको छ । त्यस्तै, समसामयिक राजनीतिक विषयहरुमा समेत छलफल हुने पौडेलले बताए । राष्ट्रियसभाको बैठक अघि महासमितिको बैठक गर्न नहुने भन्दै सभापति देउवाले बैठक सार्नुपर्ने प्रस्ताव बैठकमा गर्ने बताइएको छ ।