नेपाली बजारमा यो साता सुनको मूल्य बढ्यो

२९ मंसिर, काठमाडौं । स्थानीय बजारमा यस साता सुनको मूल्य प्रतिदश ग्राम रु एक हजार तीन सय ७० ले बढेको छ । नेपाल सुनचाँदी व्यवसायी महासंघका अनुसार साताको पहिलो दिन आइतबार प्रति दस ग्राम रु एक लाख सात सय ४० मा कारोबार भएको थियो । शुक्रबार रु एक लाख दुई हजार एक सय दशमा उक्त सुन कारोबार भएको छ ।

नेपाली बजारमा पनि यो साता सुनको मूल्य बढ्यो । स्थिर रहेको सुनको मूल्य साताको दोस्रो दिन सोमबार बढेर त्यसपछि दुई दिन केही घटे पनि बिहीबारदेखि  पुनः बढेको थियो ।

महासंघका अनुसार यो साता पनि विश्व बजारमा सुनको मूल्य बढेको छ । अमेरिकी रिजर्भ बैंक फेडले ब्याजदर कटौती गर्ने सङ्केत गरेसँगै बढेको सुनको मूल्यमा विभिन्न मुलुकमा जारी द्वन्द्वले थप असर पारेको विश्लेषकहरुको बताएका छन् । उनीहरूले नयाँ वर्षमा सुनको मूल्यले रेकर्ड कायम गर्न सक्ने आँकलनसमेत गरेको महासंघले उल्लेख गरेको छ ।

यो साता नेपाली बजारमा चाँदीको मूल्य पनि बढेको छ । साताको पहिलो दिन आइतबार रु एक हजार दुई  सय २२ मा कारोबार भएको चाँदीको मूल्य साताको अन्तिम दिन शुक्रबार प्रति १० ग्राम रु एक हजार दुई सय ६० कायम भएको  महासंघका कार्यवाहक महासचिव किरणभाइ बज्राचार्यले जानकारी दिए ।