सुनुवाइ समितिमा प्रस्तावित न्यायाधीश पौडेलको ब्रिफिङ, ‘उच्चमा रहँदा ४ हजार ७७५ मुद्दाको फैसला गरे’

१ पुस, काठमाडौं । सर्वोच्च अदालतका प्रस्तावित न्यायाधीश महेश शर्मा पौडेलले सर्वोच्चको कार्यबोझ न्यूनीकरणका निम्ति संविधान तथा कानुन परिमार्जनको प्रस्ताव समितिमा पेस गरेका छन् । आइतबार संसदीय सुनुवाइ समितिको बैठकमा उनले पेस गरेको कार्यायोजनामा अदालतमा अहिले मुद्दाको संख्या वृद्धि हुने क्रम बढेको उल्लेख छ । 

सर्वोच्च अदालतको न्यायाधीश पदमा नियुक्तिका लागि न्याय परिषद्बाट सिफारिस भएका उच्च अदालत पाटनका न्यायाधीश महेश शर्मा पौडेलले आफ्नो अवधारणा पत्र र कार्ययोजना प्रस्तुत गरेका हुन् ।  समितिमा उनले १५ पृष्ठ लामो अवधारणा पत्र र कार्ययोजना प्रस्तुत गरेका छन् । 

न्याय अनुभूत गरिने र सन्तुष्टि प्राप्त गरिने विषय भएकाले न्यायपालिकाबाट सम्पादन भएका काम कारबाही स्वच्छ, सरल, शीघ्र, प्रभावकारी र गुणस्तरीय भएमा मात्र न्यायका सेवाग्राही र आम जनसाधारणले न्यायको अनुभूति र सन्तुष्टि प्राप्त गर्ने उनको भनाई छ । न्यायकर्मीहरुको निष्ठा, इमानदारिता, लगनशीलता र प्रतिबद्धताले नै न्यायपालिकाबाट प्रवाह हुने सेवालाई स्वच्छ, गुणस्तरीय र प्रभावकारी बनाउन सकिने उनको भनाइ छ । 

मिति २०५० साल श्रावण १ गतेदेखि निजामती सेवा अन्तर्गत न्याय सेवाको शाखा अधिकृतबाट सुरु भएको आफ्नो न्याय सेवाको यात्राले तीन दशक पार गरेको पौडेलले जिकिर गरेका छन्  । यी तीस वर्षमा आफूले इमानदारिता र निष्ठालाई आदर्श तथा आधार मानी देश र देशवासीका हित र सेवामा आफूलाई समर्पित गरेको दाबी गरेका छन् । 

उच्च अदालतको न्यायाधीशको रूपमा करिब सात वर्ष सेवा गर्दा जम्मा ४७ ७५ मुद्दामा फैसला गरेको छु जुन वार्षिक सरदर ७०० को दरले रहेको छ र उच्च अदालतका न्यायाधीशको औसत प्रतिव्यक्ति फर्छ्यौट दरभन्दा धेरै माथि छ,’ उनको जिकिर छ । 

न्याय सेवाका विभिन्न पदमा रही कार्य गर्दा सरकारी वकिलको रूपमा अभियोजनसमेतका कार्य, दुवै संविधान सभाको निर्वाचनमा कानुन महाशाखा प्रमुख, राज्यकै सर्वोच्च पद राष्ट्रपति र उपराष्ट्रपतिको २०७९ सालको निर्वाचनमा निर्वाचन अधिकृत, केही समय अख्तियार दुरुपयोग  अनुसन्धान आयोगमा भ्रष्टाचार विरुद्ध अनुसन्धान कार्य र सचिवका रूपमा बेपत्ता पारिएका व्यक्तिको छानबिन आयोगमा रहँदा सङ्क्रमणकालीन न्यायसम्बन्धी कार्य गर्ने अवसर प्राप्त गरेको उनले जानकारी दिएका छन् । राज्यका महत्त्वपूर्ण जिम्मेवारीमा रहँदा तोकिएका सबै जिम्मेवारीहरू कुशलतापूर्वक निर्वाह गरेको उनले बताए । 

यस्तो छ सर्वोच्चमा प्रस्तावित न्यायाधीश पौडेलको अवधारणा पत्र र कार्ययोजना