यति राम्रो काम गर्दा मलाई भ्रष्टाचारी भनियोः प्रधानमन्त्री

१ पुस, महोत्तरी । प्रधानमन्त्री पुष्पकमल दाहालले सरकारले थालेका राम्रा कामलाई लिएर प्रतिक्रियावादीहरु आतंकित भई जनतामा गलत भ्रम छर्न थालेको बताएका छन् । उनले एनसेलको शेयर खरिद बिक्रीमा अरबौको भ्रष्टाचार गरेको भनेको प्रतिक्रियावादीहरुले आफूमाथि आरोप लगाएको बताए । 

महोत्तरीको बर्दिवास–३ मा रहेको जनता माद्यमिक विद्यालयको स्वर्ण जयन्ती महोत्सवमा बोल्दै प्रधानमन्त्री दाहालले सरकारले देशव्यापी रुपमा थालेको सामाजिक न्याय, सुशासन र समृद्धिका पक्षमा भएका कामबाट एक थरी मान्छे आतंकित बनेको बताएका हुन् ।

एकथरी मान्छेहरु आफू नेतृत्वको सरकारले देशव्यापी रुपमा थालेको सामाजिक न्याय, सुशासन र समृद्धिका पक्षमा भएका कामबाट आतंकित भएको उनले बताए । एनसेलमा अर्बौंको भ्रष्टाचार गरे प्रचण्डले भनेर जनतामा भ्रम छर्न थालिएको प्रति उनले आश्चर्य प्रकट गरे । 

गठबन्धन र मन्त्रिपरिषद्को बैठकबाट एनसेलसम्बन्धी भएका समग्र गतिविधि छानबिन गर्न समिति बनाएपछि प्रतिक्रियावादीहरुले जानीबुझी सरकारका राम्रा कामको कुप्रचार गर्ने षड्यन्त्र रचेकाले यस्तो भ्रममा नपर्न दाहालले सबैमा अपिल गरे । उनीहरुले माओवादी केन्द्रको नेतृत्वको सरकारले थालेका कामहरुबाट देशमा सकारात्मक परिवर्तन सुरु भएको देख्न नसकेको दाहालको आरोप थियो ।

भारत, चीन, अमेरिका भ्रमण र संयुक्त राष्ट्रसंघ, इटालीको खाद्य सम्मेलन, कोप–२८ लगायतका सभा र सम्मेलनमा आफ्नो सहभागिताले नेपालको उपस्थितिमात्रै नभएर विश्वसामु नेपाल र नेपाली जनताको पक्षमा नयाँ आयाम थपेको दाहालले बताए । सरकारको एक वर्षमा देशको अर्थतन्त्रमा लगातार प्रयासपछि केही प्रगति भए तापनि नयाँ वर्षबाट नयाँ प्रक्रियाबाट नेपालको अर्थतन्त्रलाई गति दिने प्रतिबद्धता आफ्नो रहेको दाहालले बताए ।

नेपालमा शिक्षामा गुणात्मक रुपान्तरण गर्नु देशको अहिलेको महत्वपूर्ण कार्यभार भएको भन्दै प्रधानमन्त्री दाहालले शिक्षा विधेयक छिट्टै मन्त्रिपरिषद्बाट पारित गराएर कार्यान्वयनमा ल्याउनेसमेत प्रतिबद्धता जनाए । शिक्षामा युगसांपेक्ष परिमार्जन राष्ट्रिय आवश्यकता भएकाले शिक्षासम्बन्धी विधेयक परिमार्जन र कार्यान्वयनमा सरकारले विशेष जोड दिने उनले बताए ।