रामजानकी विवाह सम्पन्न

२ पुस, काठमाडौं । जनकपुरधाममा रामजानकी विवाह धुमधामका साथ मनाइएको छ । प्रत्येक वर्ष मार्गशीर्ष शुक्ल पञ्चमीका दिन मनाइने विवाह पञ्चमी सीतारामको आराधनासहित जानकी मन्दिरमा प्रतीकात्मक रुपमा विवाह सम्पन्न भएको हो । विवाह महोत्सवमा सहभागि भक्तजनले खचाखच भरेको जनकपुर सोमबार बिहानैदेखि फर्किन थालेका छन् ।

विवाह महोत्सवमा सहभागी साधुसन्तहरूकालागि जानकी मन्दिरमा भण्डार आयोजना गरी आज रामकलेवा बिधि गरी विवाह महोत्सव सम्पन्न हुनेछ । पौराणिक मान्यताअनुरूप जानकी मन्दिर र राम मन्दिरबाट बाजागाजा, झाकीसहित प्रतिमालाई विशेष रूपमा निर्मित डोला सिंहासनमा राखी रंगभूमिमा स्वयंवरविधि, परीक्षणको वैवाहिक विधि सम्पन्न भएपछि सीता–रामलाई जानकी मन्दिरमा ल्याइ मिथिला संस्कृतिअनुसार विवाह सम्पन्न गरिएको थियो ।

त्रेता युगमा मार्गशीर्ष शुक्ल पञ्चमीका दिन सीता र रामको विवाह भएको सम्झनामा यो उत्सव मनाइने चलन रहेको छ । मिथिलाको प्राचीन राजधानी जनकपुरधाममा भगवान् सीता र रामको विवाह महोत्सव विधिपूर्वक मनाइएको छ । सीतालाई छोरी–बहिनीका रूपमा मान्ने मिथिलावासी महोत्सवमा देवीदेवताको सहभागिता सशरीर नभए पनि अदृश्यरूपमा हुने विश्वासले हर्षोल्लासका साथ प्रतिछाया जन्तीको आगमनदेखि बिहेसम्ममा सहभागी हुने गरेका छन् ।