मेलम्ची माग्दै रित्ता गाग्री बोकेर काठमाडौंवासी सडकमा

२ पुस, काठमाडौं । खानेपानी माग गर्दै काठमाडौंका स्थानीय सडकमा उत्रिएका छन् । मेलम्ची खानेपानी आयोजनामाथिको चलखेल बन्द गर्न माग गर्दै काठमाडौंमा नागरिकले सोमबार प्रदर्शन गरेका हुन् । काठमाडौं उपत्यका संघर्ष समितिले कोटेश्वर–तीनकुने क्षेत्रमा रित्ता भाँडा प्रदर्शन गर्दैै विरोध जनाएको हो । 

अघिल्लो वर्षको २३ मंसिरमा उपत्यकावासीको धारामा मेलम्चीको पानी झरे पनि यस वर्ष पानी कहिले आउँछ कुनै टुंगो छैन । मेलम्ची खानेपानी आयोजनाको मुख्य बाँधसम्म पुग्ने बाटो हालसम्म निर्माण नभएका कारण मेलम्चीको पानी काठमाडौं झर्ने मिति धकेलिएको छ ।

मेलम्चीमाथि बारम्बार राजनीतिक चलखेल भएको भन्दै काठमाडौंवासीले चलखेल बन्द गरी तुरुन्त पानी सञ्चालन गर्न माग गर्दै विरोध ¥याली निकालेका हुन् । लामो समयदेखि काठमाडौंमा मेलम्चीको पानी आउन सकेको छैन । अझै कहिले निर्माण सम्पन्न भएर पानी आउने हो भन्ने टुंगो छैन् ।