गृहको ढिलाइले आईजीपीलाई सात एसपी छान्न सकस

२ पुस, काठमाडौं । नेपाल प्रहरीका रिक्त प्रहरी उपरिक्ष (एसपी) पदमा बढुवा गर्न प्रहरी प्रधान कार्यालयलाई निकै हम्मे परेको छ । समयमै बढुवा गर्न नसकेको भनेर प्रहरी महानिरीक्षक बसन्तबहादुर कुँवर आलोचित पनि हुने थालेका छन् । प्रक्रिया मिलाएर रिक्त रहेका भन्दा बढी पदमा  डीएसपीहरूको बढुवा गरेर एसपीमा ल्याउने उनको तयारी छ । तर, गृहमन्त्रालयले पठाउनुपर्ने फाइल मन्त्रिपरिषदमा पठाएको छैन् । 

महानिरीक्षक कुँवरले भरसक प्राविधिक तर्फका दरबन्दी मिलाएर बढुवा गर्ने तयारी गरेका छन् । बढुवाका लागि प्रतिस्पर्धी धेरै भएकाले तत्काल छान्न नसक्नु अर्को कारण पनि रहेको छ । प्रहरी प्रधान कार्यालयले बढुवा गर्नुपर्ने सात एसपीका लागि अहिले १२ जना डीएसपी प्रतिस्पर्धामा छन् । एकै ब्याजमा भर्ना भएर आएका डीएसपीहरूको संख्या धेरै छ । 
 
बढुवा प्रक्रिया मिलाउनका लागि प्रहरी प्रधान कार्यालयले प्राविधिक तर्फका दुई दरबन्दी साधारण समूहतर्फ समायोजन गृह मन्त्रालयमा प्रस्ताव पठाएको छ । दुईजना थप गरेर ९ जनालाई बढुवा गर्ने तयारीमा महानिरीक्षक कुँवर छन् । प्राविधिक र एमटी (सवारी व्यवस्थापन) शाखामा रिक्त दरबन्दीलाई साधारण समूहतर्फ सारेर नौ पुर्याउने उनको तयारी छ । यसका लागि मन्त्रिपरिषदले निर्णय गर्नुपर्ने हुन्छ । 

मन्त्रिपरिषदबाट निर्णय भएर आउनुपर्ने भएकाले यो प्रक्रियाका लागि प्रहरी प्रधान कार्यालयले गृह मन्त्रालयमा प्रस्ताव पनि पठाइसकेको छ । प्रहरी मुख्यालयले पठाएको पस्तावमाथि अहिले अध्यायन भइरहेको गृहका एक अधिकारीले बताए । आउने मन्त्रिपरिषदमा उक्त प्रस्ताव लैजाने गृहमन्त्रीको तयारी छ । एसपी बढुवामा गृहमन्त्री नारायणकाजी श्रेष्ठको पनि चासो छ ।   

बढुवाको तयारीमा रहेका डीएसपीहरूले पनि आफूलाई बढुवामा पार्नका लागि अनेक उपायहरु अपनाइरहेका छन् । मेरो डीएसपीलाई एसपीमा बढवा गरिदिनुपर्यो भनेर गृहमन्त्री समक्ष धाउने नेताहरूको संख्या नि धेरै छ । जति बढुवा रोकेर राख्यो उतिनै महानिरीक्षक कुँवर दवावमा पर्दै आएका छन् । प्रक्रिया अनुसार नै बढुवामा जाँदा प्रतिस्पर्धी धेरै छन् । 

प्रहरी प्रधान कार्यालयका अनुसार अहिले बढुवा प्रक्रियामा रहेकाहरू सबैले एकैसाथ ०६१ सालमा प्रहरी निरीक्षकबाट सेवा सुरु गरेका छन् ।  उनीहरू ०७२ साउन १ गते डीएसपीमा बढुवा भएका थिए । उनीहरूसँगैका केही डीएसपी गएको वैशाखमै बढुवा भइसकेका छन् । यो ब्याचका डीएसपी तीन चरणमा बढुवा भएर एसपी बन्ने चरणमा छन् ।

१२ डीएसपीमध्येबाट अहिले सातजना मात्र बढुवा हुने भएकाले बाँकी पाँचजना छुट्नेछन् । सोही कारण अहिले बढुवामा महानिरीक्षक कुँवरलाई सकस परेको हो । गएको मंसिर ५ गते पाँच एसपी एसएसपीमा बढुवा भएका थिए । त्यससँगै एसपीतर्फ रिक्त दरबन्दीको संख्या सात छ । त्यसअघि, एसपीतर्फ दुई दरबन्दी रिक्त थियो ।

१२ जनामध्ये हाल बढुवाको डीएसपीहरू प्रदीपबहादुर क्षेत्री, अंगुर जिसी, ढकेन्द्र खतिवडा, यादव ढकाल, श्यामबाबु ओलिया, नारायण रञ्जितकार, निरञ्जन दत्त भट्ट, राजन लिम्बू, सन्तोष तामाङ, एकनारायण कोइराला, अनन्त शर्मा र विनोद घिमिरे एसपीको प्रतिस्पर्धामा छन् । सहजै बढुवा हुँदा १२ जनामध्येबाट उत्कृष्ट कार्यसम्पादन भएका डीएसपीको एसपीमा बढुवा हुनुपर्ने हो । 

प्रतिस्पर्धी १२ जनाले नै आफ्नो बढुवाका निम्ति विभिन्न शक्तिकेन्द्रमार्फत प्रहरी महानिरीक्षक कुँवरमाथि दवाव सिर्जना गरिरहेका छन् । एसपीसम्म बढुवाको अधिकार आईजीपीलाई हुन्छ । एसएसपीदेखि माथिल्लो तहको बढुवा गृह मन्त्रालयका सचिवको अध्यक्षताको बढुवा समितिले गर्ने गर्छ । सत्ता गठबन्धनमा रहेका दलहरू र बाहिरबाट पनि मेरो मान्छे बढुवा गरिदिनुपर्यो भनेर आउनेको लर्को छ । सम्भवतः अब बस्ने मन्त्रिपरिषदको बैठकपछि महानिरीक्षक कुँवरले मिलाएर ९ जनालाई एसपीमा बढुवा गर्ने छन् ।