नेपाल एयरलाइन्सः नियमित नचल्दा त यति कमाई, चले कति होला ?

३ पुस, काठमाडौं । नेपाल वायुसेवा निगमले मंगलबार आफ्नो आम्दानी दोब्बरले बढेको जनाएको छ । उसले तीन वर्षमा आफ्नो आम्दानी दोब्बरभन्दा बढीले वृद्धि भएको जनाएको छ । मंगलबार एक विज्ञप्ति मार्फत निगमले बितेका तीन वर्षमा आफ्नो आम्दानीमा १४४ प्रतिशतले वृद्धि गरेको बताएको हो । 

निगमले जहाज नियमित नचलेको भन्दै आलोचना आउन थालेपछि आफ्नो आम्दानीबारे जानकारी दिएको हो । निगमले महालेखा परीक्षकको लेखापरीक्षण प्रतिवेदन मुताबिक कुल आम्दानी आ.व २०७७/७८ मा ९ अर्ब १० करोड ९७ लाख ३१ हजार ८४५ रहेको र आव २०७८/७९ मा १६ अर्ब ४६ करोड ३२ लाख ६० हजार ३३३ रहेको जनाएको छ । 

यसै गरी आ.व २०७९/८० को प्रारम्भिक कुल आम्दानी २२ अर्ब २४ करोड १९ लाख ७८ हजार देखाएको छ । यसरी हेर्दा निगमले गत ३ वर्षमा आफ्नो आम्दानीमा १४४ प्रतिशतले वृद्धि गरेको छ । आठ वर्षदेखि निगमसँग अन्तर्राष्ट्रिय तर्फ चार वटा र आन्तरिक तर्फ दुई वटा जहाज उडानमा छन् ।
 
निगमले अहिलेको बजार माग सम्बोधन गर्न र प्रतिस्पर्धात्मक ढंगले बजारीकरण गरी अझै धेरै आम्दानी गर्नका लागि निगमलाई पर्याप्त मात्रामा जहाजको कमी रहेकाले यसतर्फ आवश्यक कार्य योजना बनाएर अगाडि बढ्ने काम भइरहेको बताएको छ ।