बारामा बस दुर्घटना हुँदा तीनको मृत्यु, २८ जना घाइते

४ पुस, काठमाडौं । झापाबाट काठमाडौं आउँदै गरेको यात्रुबहाक बस बारामा दुर्घटना हुँदा तीन जनाको मृत्यु भएको छ । बस र ट्रक अमलेखगञ्जनजिकै तीन नम्बर पुलमा गए राति करिब २ बजे ठोक्किदा तीन जनाको मृत्यु भएको प्रहरीले जनाएको छ । 

दुर्घटनामा परेर ट्रक चालक तनहुँ पिपलटारका २८ वर्षीय पूर्ण गुरूङ, बस चालक मकवानपुर हेटौंडा उपमहानगरपालिका ३ का ४० वर्षीय हरि शम्शेर सुयाल र करिब ३५ वर्षीय एक पुरूषको मृत्यु भएको जिल्ला प्रहरी कार्यालय बाराले जानकारी दिएको छ । गम्भीर घाइते भएका उनीहरूको उपचारका क्रममा हेटौंडा अस्पतालमा मृत्यु भएको हो ।

दुर्घटनामा २० जना घाइते छन् । काकरभिट्टाबाट काठमाडौंका लागि छुटेको बा ३–००१ ख २५८७ नम्बरको यात्रुबहाक बस र मकवानपुरको हेटौंडाबाट पथलैयातर्फ जाँदै गरेको ना ७ ख ७३०० नम्बरको ट्रक ठक्कर खाएको थियो । दुर्घटनामा २८ जना घाइते भएका छन् ।