यात्रुले लात्तले हान्दा खुल्यो बुद्ध एयरको इमर्जेन्सी ढोका

५ पुस, पोखरा । पोखराबाट काठमाडौंका लागि उड्न लागेको बुद्ध एयरको विमानको आकस्मिक ढोका खुलेको छ । एक यात्रुले लात्तले हान्दा आकस्मिक टोका खुलेको बताइएको छ । यसबारे प्रहरीले सोधपुछ गरिरहेको छ । ।

बिहान ९ बजेर ४० मिनेटमा पोखराबाट काठमाडौं उड्न लागेको उडान नं. ६५२ को जहाजको आकस्मिक ढोका यात्रुले खोलेका थिए । विमान ट्याक्सी वे बाट धावनमार्गमा जान लागेको बेलामा ढोका खुलेपछि यात्रुहरु चिच्याएका थिए । 

बुद्ध एयरले यात्रुबाट के कति कारणले ढोका खुल्न गएको हो, यसबारे पोखरा टर्मिनलका सुरक्षाकर्मीले अध्ययन गरिरहेको जनाएको छ । ढोका खोलेको विमान बुद्ध एयरका प्राविधिकले जाँच गरिरहेका छन् । 

अहिले काठमाडौंबाट इञ्जिनियर आएर चेकजाँच सुरु गरेका छन् । यात्रुलाई अर्को जहाजबाट काठमाडौं पठाइँदै गरेको बुद्ध एयरका प्रवक्ता दीपेन्द्र कर्णले बताए ।