कांग्रेसको मधेश प्रदेश सम्मेलन, विशिष्ठ अतिथिको आशन ग्रहणमा विवाद

५ पुस, जनकपुरधाम । नेपाली कांग्रेसको मधेश प्रदेश सम्मेलन आजदेखि जनकपुरधाममा सुरु हुँदै छ । जनकपुरको तरहुतिया गाछीमा हुने प्रथम सम्मेलनको उद्‍घाटन गर्न केन्द्रीय सभापति शेरबहादुर देउवासहितका शीर्षनेताहरु जनकपुर आउन लागेका छन् ।

बिहीबार उद्घाटन र भोलि शुक्रबार बिहानदेखि बन्द सत्र हुने प्रदेशसभापति कृष्णप्रसाद यादवले जानकारी दिए । उद्‍घाटन समारोहमा आठवटै जिल्लाबाट नेता कार्यकर्ता सहभागी हुँदै छन् । बन्द सत्रमा मधेश प्रदेशको आठवटै जिल्लाबाट ८२५ जना प्रदेश प्रतिनिधिले भाग लिने महामन्त्री वृहस्पति कृष्ण श्रेष्ठले जानकारी दिए । सम्मेलनमा राजनीतिक, सांगठनिक र आर्थिक प्रतिवेदन प्रस्तुत हुने छ ।

सम्मेलनमा वरिष्ठ नेता शेखर कोइरालालाई विशिष्ट अतिथिको रुपमा सहभागी नगराउने भएपछि शेखरपक्ष असन्तुष्ट बनेको छ । कोइराला सम्मेलनमा सहभागी हुने नहुने निश्चित भएको छैन् । यसअघि दुई प्रदेशमा भएका सम्मेलनमा कोइराला देउवापछिको आसनमा बस्दै आएका थिए । 

मधेशमा भने सभापति देउवापछि उपसभापति पूर्णबहादुर खड्कालाई राखिएको छ । कोइराला पक्षले देउवापछि कोइरालालाई आशन ग्रहण गराउनुपर्ने भन्दै माग राखेको छ । विशिष्ट अतिथिको विवादकाबारे कोइरालाले भने केहि बताएका छैनन् । उनी सम्मेलनमा नआउने उक्त समूहका नेताहरूले बताएका छन् ।