पार्टीमा इगो नराखी कांग्रेसको नेतृत्वदायी भूमिकालाई बचाएर लानुहोलाः सभापति देउवा

७ पुस, काठमाडौं । नेपाली कांग्रेसका सभापति शेरबहादुर देउवाले पार्टीमा सम्मानको इगो बढेर गएको भन्दै यसले कसैलाई पनि हित नगर्ने बताएका छन् । उनले पार्टीमा सबैको त्याग रहेपनि उभन्दा म ठूलो भन्ने भावना विकासित भएको बताए । देउवाले लाभको अपेक्षा नगरी यागदान गरिरहेका नेताहरुबाट अहिलेसम्म पार्टी बचेको दावी गरे ।  

अपेक्षा नगरी पार्टीका लागि योगदान गर्ने नेता तथा कार्यकर्ता रहेको र त्यस्ता नेता तथा कार्यकर्ताप्रति आफ्नो सम्मान रहेको उनले बताए । वाग्मती प्रदेश सम्मेलनलाई आज संबोधन गर्दै सभापति देउवाले देश दोधारमा उभिएको भन्दै यसलाई सम्हाल्न कांग्रेस तयार रहनुपर्ने बताए । 

उनले भने, ‘देश अहिले संक्रमणकालमा उभिएको छ । कांग्रेस नेतृत्वदायी भूमिकामा बसेर समावेशी समानुपातिक लोकतान्त्रिक व्यवस्था स्थापित गरेका छौँ । यो महत्वपूर्ण कुरा हो । साथीहरूको त्याग तपस्या र बलिदानले ठूलो पार्टी बन्न सकेको छ । ग्रासरुटदेखि नै बलियो बनाउन सबै साथीहरू लाग्नुहुनेछ । अहलिे कांग्रेस नेतृत्वदायी भूमिकामा छ यसलाई साथिहरुले बचाएर लाने काम गर्नुहोला ।’

पार्टीमा मेलमिलाप आवश्यक रहेको उनले बताए । जितहार स्वाभाविक भएको भन्दै हार्नेले जित्ने साथीलाई सहयोग गर्नुपर्छ । जित्ने सधैँ जित्ने हार्ने सधैँ हार्ने होइन, पूर्ण रुपमा मेलमिलाप हुन सकेको छैन, कांग्रेसभित्र मेलमिलापको अवस्यकता छ । हामी मिलेनौ भने उरुले हेप्छन् ।