देउवालाई ओलीको प्रस्तावः १३ सीट लानु, ७ सीट दिनु

८ पुस, काठमाडौं । नेकपा एमालेका अध्यक्ष केपी शर्मा ओलीले राष्ट्रियसभा सदस्य निर्वाचनमा कांग्रेससँग सहकार्यको प्रस्ताव गरेका छन् । नेपाली कांग्रेसका एक नेताले एमालेले कांग्रेससँग सहकार्यको प्रस्ताव गरेको बताएका छन् । कांग्रेसले एमालेको प्रस्ताव स्वीकार गरेमा यो सत्ता गठबन्धन तत्काल विघटन हुने सम्भावना रहन्छ । 

आइतबार बिहान प्रमुख दलको तीन नेताहरुको बेठक बालुवाटारमा बसेको थियो । बैठकमा कांग्रेस सभापति शेरबहादुर देउवा, प्रधानमन्त्री पुष्पकमल दाहाल प्रचण्ड र नेकपा उमालेका अध्यक्ष केपी शर्मा ओली थिए । देउवाले साथमा नेता रमेश लेखकलाई पनि लगेका थिए । बैठकबाट ओली निस्किएपछि प्रधानमन्त्रीले देउवासमक्ष हिजोको विषयमा के निर्णय भयो भनेर सेधेका थिए । 

देउवाले यसअघिको गठबन्धनका शीर्ष नेताको बैठकमा नै ओलीको प्रस्तावबारे सामान्य जानकारी गराएका थिए । देउवाले प्रस्ताव सुनाएपछि गठबन्धनका नेताहरुले ओलीको मजाक यस्तै हो । तपाइलाई राम्रो प्रस्ताव आएको रहेछ । के गर्नुहुन्छ । चाडै निर्णय लिनुहोला भनेका थिए । देउवाले कांग्रेसका सीमित नेताहरुलाई पनि ओलीको प्रस्ताव सुनाएका छन् । ती नेताले भने अरु नेतासँगको छलफलमा १३ सीटको लोभ गर्दा सवै भतभुंग हुन्छ भनेका थिए ।    

राष्ट्रपतिबाट मनोनीत हुनेसहित रिक्त २० राष्ट्रियसभा सीटमध्ये एमालेले कांग्रेसलाई १३ सीट लिन प्रस्ताव गरेको हो । बाँकी ७ सीट एमालेले लिने प्रस्ताव छ । एमाले र कांग्रेस मिल्दा राष्ट्रियसभाका रिक्त १९ सीटमै अरू दलको सम्भावना हुँदैन । राष्ट्रपतिबाट मनोनीत हुने सीट भने मन्त्रिपरिषद्को सिफारिस बमोजिम मात्र हुन्छ ।

एमालेले राखेको प्रस्ताव कांग्रेसको लागि गठबन्धनबाट प्राप्त हुने सीटभन्दा आकर्षक र लाभदायक भए पनि देउवाले उक्त प्रस्ताव स्वीकार नगरेको ती नेताले बताए ।  एमालेको प्रस्ताव मान्दा कांग्रेसलाई कम्तीमा ४ सीट फाइदा हुन्छ । तर, गठबन्धनको एकता तोड्न नसकिने कांग्रेस सभापति देउवाको अडान छ । कांग्रेसले गठबन्धनबाट ९ देखि १० सीट लिने दावी गरिरहेको छ ।