‘माधव नेपालको नजरमा एमालेको नेतृत्व झन कमजोर’

८ पुस, काठमाडाैं ।  नेकपा एकीकृत समाजवादीको सचिवाय बैठक चलिरहेका बेला  अध्यक्ष माधव नेपालले भदौ २८ गते जारी गरेको अन्तर पार्टी निर्देशन (अपानि) सच्याएर जारी गरेका छन् । पार्टीका सम्मानित नेता झलनाथ खनालसहित पार्टीका धेरै जसो नेताहरू कार्य विभाजनप्रति असन्तुष्टि जनाएपछि रोकिएपछि सचिवालय बैठक चलिरहेका बेला अपानी जारी गरेका हुन् ।  

अपानी जारी गर्दा भएको विवादपछि रोकिएको अपानी तीन महिनापछि नेताहरूबीच सहमति गरेर मनोनयन र कार्य विभाजनसहित सच्याएर अपानि जारी भएको बताइएको छ । माधव नेपालको हस्ताक्षर भएको अपानीमा पछिल्लो समय दक्षिणपन्थी र पुनरुत्थानवादी शक्तिहरूको सक्रियता बढ्दै गएको बताएका अध्यक्ष नेपालले यसका कारण अहिलेसम्म देशका उपलब्धि पनि धर्मराउने अवस्था आएकोमा चिन्ता जनाएका छन् । उनले एकपछि अर्को जटिलताका कारण नागरिकहरू पनि राज्यसँग विश्वस्त हुन नसक्ने अवस्था देखिएको उल्लेख गरेका छन् ।

संघीय निर्वाचन क्षेत्रमा केन्द्रित गरेर भौगोलिक कार्य विभाजन गर्ने केन्द्रिय कमिटीको सोचअनुसार कार्य विभाजन गर्दा र कतिपय दोहोरो जिम्मेवारीबारे उठेका प्रश्नलाई समाधान गर्ने हिसाबले नयाँ व्यवस्था गर्दा त्यसलाई बढाइचढाइ गरेर विरोध गरेको अपानीमा उल्लेख छ ।

जारी भएको अपानीमा कार्यविभाजनको विषयमा उठेका कतिपय प्रश्नलाई ध्यान दिँदै त्यस अपानीलाई फिर्ता गर्ने र साविकको कार्यविभाजनलाई सामान्यतया यथावत राखेर कार्य विभाजन गर्ने र नयाँ अपानी जारी गरेको छ । साथै जारी अपानीमा  नेकपा एमालेको वैचारिक नेतृत्व कमजोर भएको तथा त्यसले वामपन्थी नेतृत्व गर्न नसक्ने पनि उल्लेख गरिएको छ ।

‘नेकपा एमाले वामपन्थी जनमत भएको ठूलो पार्टी भए पनि संसद विघटनपछि त्यसको नेतृत्वमा झन् बढि वैचारिक, सैद्धान्तिक र साङ्ठानिक समस्याहरूमा जेलिँदै गएका छन् र समग्र पार्टी दक्षिणपन्थी व्यक्तिपूजाको शिकार हुँदै गएको छ । कतिपय सैद्धान्तिक कारणले नेकपा माओवादी केन्द्रले अहिलेको राजनीतिमा हस्तक्षेप गर्ने गरी एक्लै पहलकदमी लिन सक्दैन ।

यस परिस्थितिमा वैचारिक तथा सैद्धान्तिक कार्यदिशाका हिसाबले  आजका सङ्कटको वस्तुगत विश्लेषण र समाधानको स्पष्ट बाटो लिएको राजनीतिक शक्ति हाम्रो पार्टी नेकपा एकिकृत समाजवादी नै हो’, अपानीमा भनिएको छ । गत असोज १४—२८ मा पार्टीले आयोजना गरेको ‘समाजवादी जागरण अभियान’ का दौरानमा अहिलेका समस्या र तिनको समाधानबारे सार्वजनिक रुपमा हामीले राखेका धारणाहरूमा देखिएको जनसमर्थनले पनि त्यसलाई पुष्टि गरेको पनि जनाएको छ । ‘हामीले लिएको वैचारिक तथा सैद्धान्तिक कार्यदिशाका आधारमा शक्तिशाली पार्टी निर्माण गर्नु आज हामीमाथि आइ परेको कार्यभार हो ।

हाम्रो कम्युनिष्ट आन्दोलनमा अहिले चुनौती थपिएको छ, स्वयं हाम्रो पार्टीका सामु अनेकौँ चुनौती छन् । तर हरेक क्रान्ति अनेकौँ असफलता र कमजोरीको सामना गर्दै शक्तिशाली हुँदै जान्छ । आज समग्र राजनीतिमा, कम्युनिष्ट आन्दोलनमा र हाम्रो आफ्नै पार्टीमाथि देखिएका चुनौतीलाई हामीले अलग—अलगरुपमा होइन बरु समग्रतामै बुझ्नु पर्छ । अर्थात् जुन चुनौति हाम्रो पार्टीमा छन् तिनै चुनौती मुलुकको राजनीतिमाथि देखा परेका चुनौति हुन् ’, अपानीमा भनिएको छ ।

अपानिमा भनिएको छ, जिम्मेवारी हेरफेर पार्टी जीवनमा नियमित विषय हो । त्यसमा चित्त नबुझे आफ्नो मत राख्न सकिन्छ तर त्यस्ता विषयलाई लिएर सार्वजनिक आरोप–प्रत्यारोपमा नउत्रिन पार्टी पङ्क्तिलाई निर्देशित गर्छ । यसैगरी ७० औँ केन्द्रीय सचिवालय बैठकले यही पुस ११ देखि १३ गतेसम्म केन्द्रीय कमिटी बैठक बोलाउने निर्णय गरेको छ ।

पार्टी अध्यक्ष नेपालको अध्यक्षतामा बसेको बैठकले पार्टीको प्रस्तावित विधानको मस्यौदा केन्द्रीय कमिटीको बैठकमा लैजाने निर्णय गरिएको पार्टीका उपमहासचिव एवं पार्टी प्रचार विभाग प्रमुख जगन्नाथ खतिवडाले जानकारी दिए । मस्यौदाको धारा उपधारामाथि छलफल गरिएको बैठकमा थप छलफल आवश्यक रहेकाले केन्द्रीय कमिटी बैठकबाट निर्णय लिन लागिएको हो ।  

सचिवालय बैठकले केन्द्रीय कमिटी बैठकको तयारीमा जुट्न निर्देशन दिएको छ । यही पुस ९ र १० गते तय गरिएको स्थायी कमिटीको बैठकलाई केन्द्रीय कमिटी बैठकमा समायोजन गर्ने बैठकले निर्णय गरेको छ । त्यसैगरी बैठकले कलेजो, किड्नी ट्रान्सप्लान्टजस्ता जटिल रोगलाई दृष्टिगत गर्दै पार्टीका नेता कार्यकर्तालाई अङ्गदान गर्न आह्वान गर्ने निर्णय गरेको छ ।