श्रीराम मन्दीर अयोध्याका लागि जनकपुरधामबाट गहना पठाइँदै

९ पुस, काठमाडौं । नेपालले अर्को महिना अयोध्यामा रहेको राम मन्दिरको उद्‍घाटन समारोहका लागि विभिन्न प्रकारका गहना, भाँडाकुँडा, लुगा र मिठाई पठाउने भएको छ ।

भगवान श्रीरामको ससुराली जनकपुरधामबाट धार्मिक सरसमानमान पठाउनका लागि जनकपुरधाम-अयोध्या धाम यात्राको आयोजना गरिने भएको छ ।

जानकी मन्दिरका सहमहन्त रामरोशन दास वैष्णवले सो धाम यात्रा १८ जनवरीबाट सुरु भई जनवरी २० मा समापन हुनेछ र सोही दिन जनकपुरधामवाट लगिएको सामग्री श्री राम मन्दिर ट्रस्टलाई हस्तान्तरण गरिनेछ । अयोध्यामा सो राममन्दिरको अभिषेक समारोह जनवरी २२ मा हुँदैछ ।

जनकपुरधामबाट सुरु भएको यात्रा जलेश्वरनाथ, मलंगवा, सिम्रौनगढ, गढीमाई, वीरगञ्ज, बेतिया, कुशीनगर, सिद्धार्थनगर, गोरखपुर हुँदै उत्तर प्रदेशको अयोध्या पुग्नेछ ।

यसअघि नेपालको कालीगण्डकी नदी किनारबाट सङ्कलन गरिएको शालिग्राम ढुङ्गालाई रामको मूर्ति बनाउन अयोध्या पठाइएको थियो, जसलाई उद्‍घाटनको दिन मन्दिरमा स्थापना गरिने छ ।