टेकनाथले बुझाए अदालतमा १५ लाख रुपैयाँ धरौटी, बुधबारसम्म रिहा हुने

९ पुस, काठमाडौं । भुटानी शरणार्थी नेता टेकनाथ रिजालले अदालतले तोकेको धरौटी रकम  बुझाएका छन् । काठमाडौं जिल्ला अदालतमा १५ लाख रूपैयाँ धरौटी रकम बुझाएका हुन् । 

स्रोतका अनुसार टेकनाथले आइतबार नै १५ लाख रूपैयाँ रकम धरौटीमा बुझाएका थिए । तर कार्यालय समय सोही दिन सकिएकाले उनी रिहा हुन सकेनन् । सम्भवतः टेकनाथ बुधबारसम्म रिहा हुनेछन् । अदालतबाट छुट पुर्जी पनि लिएका छन् । 

नक्कली भुटानी शरणार्थी प्रकरणमा थुनामा रहेका आरोपी रिहा हुने स्थितिमा सम्पत्ति शुद्धीकरण अनुसन्धान विभाग र अख्तियार दुरुपयोग अनुसन्धान आयोगले आफूलाई बुझाउन केन्द्रीय कारागारलाई आग्रह गरेको छ ।

शरणार्थी प्रकरणका आरोपीसँग यी दुई निकायले पनि अनुसन्धान गरिरहेका छन् । तर सोमबार र मंगलबार सरकारी कार्यालय बिदा परेका कारण रिजाललाई सम्पत्ति शुद्धीकरण र अख्तियारमा बुझाउन नसकिने भएकाले उनी थुनामै रहेका हुन् ।

नेपाली नागरिकलाई भुटानी शरणार्थी बनाएर अमेरिका पठाउने ठगी धन्दामा काठमाडौं जिल्ला अदालतले रिजाललाई पुर्पक्षका लागि थुनामा पठाउने आदेश दिएको थियो । 

तर उच्च अदालत पाटनले उनलाई १५ लाख रूपैयाँ धरौटीमा रिहा गर्न आदेश दिएको थियो । धरौटीमा छोड्न आदेश दिएका अरू आरोपीहरु धरौटी रकम बुझाएर यसअघि नै रिहा भइसकेका छन् ।