पक्राउ पुर्जी जारी भइसकेको व्यक्ति खुलेआम घुम्दै : प्रहरीकै भूमिका शंकास्पद, पीडित त्रासमा

मुकेशकुमार यादव 

१० पुस, सिरहा । सिरहामा ज्यान मार्ने उद्योग मुद्दामा फरार प्रतिवादी खुलेआम घुमे पनि प्रहरीले पक्राउ गरेको छैन । कल्याणपुर नगरपालिका ८ मझाउका हेमनी देवी शाहले ज्यान मार्ने मुद्दा दर्तापछि सिरहा जिल्ला अदालतले ३५ दिने पक्राउ पुर्जी जारी गरे पनि कसुरदारहरूलाई प्रहरीले पक्राउ गर्न आनाकानी गरेको हो। 

आर्थिक प्रभाव र राजनीतिक दवावका कारण प्रहरीले खुलेआम रुपमा घुमिरहेका ज्यान मार्ने मुद्दाका प्रतिवादीहरुलाई पक्राउ गर्न सकेका छैन । पक्राउ पुर्जी जारी गरिएका प्रतिवादीहरु अझै पनि प्रहरीसँगै उठबस गर्ने गरेको स्थानीय बताउँछन् । 

हेमनी देवी शाहले दिएको जाहेरीको आधारमा सिरहा जिल्ला अदालतले गत ८ असोजमै पक्राउ पुर्जी जारी गरेको थियो।करिब ६ महिना अगाडि कल्याणपुर नगरपालिका ८ मझाउका राम भरोस साह, भोला साहलगायत पाचँजनालाई सामान्य विषयमा झै–झगडा हुँदा ज्यान मार्ने नियतले धारिलो हतियार प्रहार गरी घाइते बनाएको पीडित परिवारको आरोप छ ।

साहले झगडामा घाइते भएकाहरु उपचारपश्चात इलाका प्रहरी कार्यालय मिर्चैयामा कल्याण्पुर नगरपालिका ८ का किशारी भन्ने राम किशोर यादव, राम कुमार यादव, डम्बर भन्ने अजयकुमार यादव, अमरकुमार यादव र दिपककुमार यादवविरुद्ध ज्यान मार्ने उद्योग मुद्दा दर्ता गरेका थिए । तर, उनीहरू खुलेआम हिँडे पनि प्रहरीले पक्राउ गर्न नसक्दा पीडित निराश बनेका छन् । 

सिरहा अदालतले उनीहरुलाई पक्राउ गरी अदालतमा हाजिर गराउन निर्देशन दिए पनि प्रहरीले पक्राउ नगरेको देख्दा पीडितहरुमा नै त्रासमा छन् । अदालतको आदेशलाई नै अवज्ञा हुने गरी प्रहरीले आरोपीलाई पक्राउ नगरी उन्मुक्ति दिन खोजेपछि पीडितमा त्रास बढेको हो । 

कल्याणपुर नगरपालिका ८ का वडा अध्यक्ष समेत रहेका किशोरी भन्ने रामकिशोर यादवविरुद्ध समेत मुद्दा परेको छ । तर, उनी अझै नियमित रुपमा वडा कार्यालय पुगेर कार्यसम्पादनमा सक्रिय छन्।  जिल्ला अदालतले पक्राउ पुर्जी जारी गर्दासमेत प्रहरी भन्ने अनभिज्ञता प्रकट गर्नुले राजनीतिक दवाव र आर्थिक प्रभावकै कारण उनीहरु खुलेआम हिँडिरहेको स्थानीयहरु बताउँछन्।  

वडा अध्यक्ष यादव सत्तापक्षधर पार्टी नेपाली कांग्रेसबाट निर्वाचित बनेका हुन् ।  उनीहरुलाई पक्राउ नगरेको विषयमा जिल्ला प्रहरी कार्यालय सिरहाका प्रहरी निरीक्षक उद्धव भवन द्विवेदीले मुद्दा शाखामा बुझ्नु भन्दै थप बताउन चाहेनन् । मुद्दा शाखाले यसबारे अनुसन्धान भइरहेको भन्दै थप केही बताउन चाहेनन् ।

अदालतबाट पक्राउ पुर्जी जारी भइसक्दा पक्राउ नगर्नुले आरोपीलाई बचाउन प्रहरी नै संलग्न भएको हो कि भन्ने पीडितले आशंका गरेका छन् । अदालतबाट पक्राउ पुर्जी जारी भइसकेपछि पक्राउ गरेर अनुसन्धान गर्नुपर्ने प्रहरीको भूमिका पनि शंकास्पद देखिएको छ ।