अब निर्धारित पूर्वकार्यक्रमबाहेक सार्वजनिक कार्यक्रममा जाँदैन : प्रधानमन्त्री प्रचण्ड

१० पुस, काठमाडौं । प्रधानमन्त्री पुष्पकमल दाहाल ‘प्रचण्ड’ले आफ्नो नेतृत्वमा सरकार गठन भएको एक वर्ष पूरा भएको अवसरमा अहिले राष्ट्रका नाममा सम्बोधन गरेका छन् । उनले अहिले सिंहदरबारस्थित प्रधानमन्त्री कार्यालयबाट सम्बोधन गरिररहेका छन् ।

मंगलबार राष्ट्रका नाममा सम्बोधनका क्रममा प्रधानमन्त्री दाहालले कार्यक्षमता कमजोर भएका राजदूत र नियोग प्रमुखहरूलाई फिर्ता बोलाउने तयारी भइरहेको जानकारी दिएका छन् । प्रधानमन्त्री दाहालले सम्बोधन गर्दै नेपालले विदेशमा पठाएका राजदूत र कूटनीतिक नियोग प्रमुखहरूलाई कार्यक्षमताका आधारमा मात्रै पदमा राख्ने स्पष्ट पारेका हुन् ।

उनले प्रधानमन्त्री दाहालले मुलुकमा लगानी ल्याउने भूमिका खेल्ने र पर्यटन वृद्धिका लागि कूटनीतिक गतिविधि हुनुपर्ने बताएका छन् । यस्तै सम्बोधनका क्रममा प्रधानमन्त्री दाहालले अब निर्धारित पूर्वकार्यक्रमबाहेक सार्वजनिक कार्यक्रममा नजाने घोषणा गरेका छन् ।

उनले नयाँ नीति तथा कार्यक्रम, बजेट निर्माणमा लाग्ने स्पष्ट पारेका छन् । उनले विकास र सुशासनका पक्षमा आफूले पहल लिन लागेको बताएका छन् । विकास र सुशासनमा देखिएका समस्या समाधानका लागि कदम चाल्नुपर्ने अवस्था आएको उनको भनाइ थियो ।

सम्बोधन समारोहमा मन्त्रिपरिषद्का सदस्य, विभिन्न मन्त्रालयका सचिवलगायत उच्च सरकारी अधिकारीको उपस्थिति छ । नेकपा 'माओवादी केन्द्र'का अध्यक्ष दाहाल गत पुस १० गते प्रधानमन्त्रीमा नियुक्त भएका थिए । वर्तमान सरकारले सुशासन, आर्थिक समृद्धि र सामाजिक न्यायलाई प्राथमिकतामा राखी कार्यसम्पादन गरिरहेको छ ।