मंगलबार कार्यशैली सुधार्छु भनेका प्रधानमन्त्री प्रचण्ड बुधबार हेलिकोप्टर लिएर पुगे नातिनीको घर

११ पुस, काठमाडौं । सरकारको एक वर्ष पुगेको उपलक्ष्यमा देशवासीका नाममा सम्बोधन गर्ने क्रममा प्रधानमन्त्री पुष्पकमल दाहाल प्रचण्डले गरेको बाचा एक दिन नपुग्दै तोडेका छन् । उनले सम्बोधनमा अब म कार्यशैली सुधार्छु र जतापायो उतै जान्न भनेका थिए । तर, एक दिन पनि टिकेन । 

कार्यशैली बदल्छु र नगई नहुने बाहेकका कार्यक्रम जान्न भनेको भोलिपल्ट गोरखा पुगेका उनी दुईवटा सार्वजनिक कार्यक्रममा सहभागी भए । पहिलो थियो उनकै निर्वाचन क्षेत्रमा पर्ने बारपाक सुलिकोट गाउँपालिकाको कार्यक्रम । बारपाक सुलिकोट गाउँपालिकाले आयोजना गरेको ‘स्थानीय सरकार र सरोकारवालासँग प्रधानमन्त्री’ कार्यक्रममा उनी पुगेका थिए । 

त्यसपछि दिउँसो ३ बजे उनी पुगे गोरखाकै गण्डकी गाउँपालिका–९ स्थित घ्याल्चोक ज्यामिरघाटमा । नेपाली सेनाको हेलिकप्टर चढेर प्रधानमन्त्री प्रचण्ड नातिनी प्रतिभा भेट्न ज्यामिरघाट पुगेका हुन् । केही दिनदेखि ज्यामिरघाटमै रहेका प्रतिभा र विज्ञानले आफ्नो गाउँमा आएका हजुरबा प्रचण्डलाई स्वागत गरेका थिए । उनीहरुले प्रचण्ड फर्किने बेलामा नेपाली सेनाको हेलिकप्टर अगाडि फोटो खिचाएका थिए ।