छानबिन नसकिएसम्म एनसेल शेयर प्रकरणमा सरकारले आवश्यक निर्णय लिन सक्दैनः मन्त्री शर्मा

१२ पुस, काठमाडौं । सञ्चारमन्त्री रेखा शर्माले एनसेलको शेयर बिक्री प्रकरणमा सरकारले गठन गरेको  छानबिन समितिले प्रतिवेदन नदिएसम्म आवश्यक निर्णय लिन नसक्ने बताएकी छन् । उनले गैरकानुनी काम भएको हो वा होइन भन्ने कुरा छानबिन समितिको रिर्पोट आएपछि मात्र भन्न सकिने बताइन् । 

एनसेल बिक्रीबारे संसदको शिक्षा समितिमा बिहीबार भएको छलफलमा मन्त्री शर्माले पूर्वमहालेखा परीक्षक टंकमणि शर्मा नेतृत्वको समितिले काम गरिरहेको बताइन् । कानुन बमोजिम काम भएका छैनन् भने जोसुकै पनि कारबाहीको दायरामा आउनुपर्छ भन्ने संकल्पका साथ सरकारले समिति गठन गरेको उनको भनाइ छ । ३० दिनको समय पाएको समितिले समयमै काम सक्ने उनको दावी छ । 

समितिले आफ्नो छानबिन सक्नासाथ सरकारले आवश्यक निर्णय लिने उनले बताइन् । अघिल्लो महिना मलेसियाको टेलिकम जायन्ट आजियाटाले नेपालको एनसेलमा रहेको आफ्नो ८० प्रतिशत शेयर ५ करोड अमेरिकी डलर अर्थात् ६ अर्ब ६५ करोडमा बेलायतको स्पेक्ट्रलाइट यूके लिमिटेडलाई बिक्री गरेको थियो ।