श्रीलङ्कामा डिसेम्बरमा दश हजारभन्दा बढी व्यक्ति डेङ्गुबाट संक्रमित

१३ पुस, कोलम्बो । श्रीलङ्कामा डेङ्गुका बिरामीको सङ्ख्या बढ्दै गएको र डिसेम्बरमा मात्रै १० हजारभन्दा बढी संक्रमित भेटिएको राष्ट्रिय डेङ्गु नियन्त्रण एकाइ 'एनडीसीयू' ले शुक्रबार जानकारी गराएको छ । 

एकाईका अनुसार डिसेम्बरमा १० हजार ५९० जनामा संक्रमण देखिएको थियो भने नोभेम्बरमा डेङ्गु संक्रमितको सङ्ख्या सात हजार ९९५ रहेको थियो । डेङ्गु संक्रमितको सङ्ख्या अक्टोबरमा चार हजार १० र सेप्टेम्बरमा दुई हजार ६०५ रहेको राष्ट्रिय डेङ्गु नियन्त्रण एकाईले जानकारी गराएको छ । 

श्रीलङ्कामा यस वर्ष हालसम्म ८७ हजार ७८ जनामा डेङ्गुको संक्रमण देखिएको छ भने ५५ जनाको मृत्यु भएको छ । कोलम्बो जिल्लामा सबैभन्दा बढी २१।१ प्रतिशत संक्रमित भेटिएका छन् । श्रीलङ्काका स्वास्थ्य अधिकारीहरूले वर्षा याममा यो रोग फैलन सक्ने चेतावनी दिएका छन् ।