खबरदार ! आइन्दा यस्तो नहोसः मन्त्री किराती

१५ पुस,काठमाडौं । संस्कृति, पर्यटन तथा नागरिक उडड्यनमन्त्री सुदन किरातीले मन्त्री भएको एक वर्षपछि कर्मचारीहरुलाई खबरदारीको भाषा प्रयोग गरेका छन् । नेपाल वायुसेवा निगमको ग्राउण्ड ह्याण्डलिङको विषयमा कुनैपनि कुरा नउठाउन कर्मचारीहरूलाई उनले दिएको निर्देशन खबरदारीको भाषमा आएको छ । मुलत ग्राउण्ड ह्याण्डलिङको विषयमा नागरिक उड्डयन प्रधिकरणका महानिर्देशक प्रदिप अधिकारीप्रति लक्षित यो निर्देशन देखिएको छ । 

आइतबार नेपाल नागरिक उड्डयन प्राधीकरणको २५ औँ वार्षिकोत्सव समारोहमा सम्बोधन गर्दै मन्त्री किरातीले ग्राउण्ड ह्याण्डलिङको विषयमा कर्मचारीहरुले अनावश्यक चासो राखेको भन्दै असन्तुष्टि व्यक्त गरे । उनले नेपाल वायुसेवा निगमको ग्राउण्ड ह्याण्डलिङको विषय सरकारको निर्णयको कुरा भएको भन्दै कर्मचारीहरूले अनावश्यक कोकोहोलो गर्नु आवश्यक नभएको बताए । उनले ग्राउण्ड ह्याण्डलिङको कुरा प्रधानमन्त्री र देशका ठूला राजनीतिक दलहरूको सरोकारको विषय भएको भन्दै कर्मचारीलाई यस विषयमा नबोल्न निर्देशन दिए । उनले देशलाई वायुसेवा निमग चाहिने र त्यसलाई बचाउनका लागि ग्राउण्ड ह्याण्डलिङ पनि चाहिने स्पष्ट पारे ।

प्राधिकरणका महानिर्देशक प्रदीप अधिकारीलाई अराजक नहुन उनको चेतावनी छ । वायुसेवा निगमको ग्राउण्ड ह्याण्डलिङ खोस्ने अधिकार कसले दियो भनेर प्रश्न गर्दै मन्त्री किराँतीले यसबारे कोकोहोलो गरेर धुवाँ नउठाउन चेतावनी दिए । मन्त्री किराँतीले निगमको जीवन मानिएको ग्राउण्ड ह्याण्डलिङ खोस्न प्राधिकरणले नसक्ने भएकाले अनावश्यक हल्ला नगर्न खबरदारी गरे । उड्डयन प्राधिकरणले मंसिर १५ गते वायुसेवा निगमको ग्राउण्ड ह्याण्डलिङ खोस्ने निर्णय गरेको थियो । 

वायुसेवा निगमले ६ दशकदेखि सेवा दिँदै आएको त्रिभुवन अन्तर्राष्ट्रिय विमानस्थलको ग्राउण्ड ह्याण्डलिङ सेवा खोस्ने र प्रतिस्पर्धा गराएर दिने निर्णय प्राधिकरणले गरेको थियो । प्राधिकरणको उक्त निर्णयपछि निगम कर्मचारीले मंसिर १८ गतेदेखि १२ दिनसम्म आन्दोलन गरे । पर्यटन मन्त्रीकै सुझावअनुसार निगमका कर्मचारीले आन्दोलन स्थगन गरिसक्दा पनि फेरि ग्राउण्ड ह्याण्डलिङकै बारेमा अनावश्यक बहस गरिएको भन्दै मन्त्री किरातीले वायुसेवा निगमको अधिकार प्राधिकरणले खोस्न नसक्ने बताए ।

वायुसेवा निगम सुधार गर्न पनि नसक्ने, निगमको लागि दीर्घकालिन भिजन बनाएर काम गर्न नदिने र भएको सेवा पनि खोसेर राष्ट्रिय ध्वजाबाहकलाई बन्द हुन नदिने भन्दै प्राधिरकणलाई चेतावनीसहित अब निगमको विषयमा बहसै नगर्न पनि मन्त्रीले आग्रह गरे । ‘यहाँ वायुसेवा निगमको बारेमा बिना प्रसंग बढी किन कुराहरू उठ्छन् ? के तपाईहरू नीति निर्माता हो ? जानुहोस् आन्दोलन गर्नुहोस् । प्रधानमन्त्रीसँग डेलिगेसन गर्नुस् र अनुमति लिएर आउनुहोस् । वायुसेवा निगम राख्ने कि नराख्ने भन्ने यो सरकारको निर्णयको कुरा हुन्छ ।’

उनले भने, ‘यसमा त अझ राष्ट्रिय सहमतिको कुरा हुन्छ । पटक–पटक तपाईहरू किन वायुसेवा निगमको कुरा उठाउनुहुन्छ यहाँ ? हो त्यो सच्चिनुपर्छ, सुधार्नुपर्छ, विकास गर्नुपर्छ, हामीलाई पनि थाहा छ,’ उनले भने, ’वायुसेवा निगमले ग्राउण्ड ह्याण्डलिङ लिने कि नलिने भन्ने प्रश्नमा किन तपाईहरू ठूलो–ठुलो धुवाँ उडाउनुहुन्छ ? कोकोहोलो गर्नुहुन्छ ? आजदेखि बन्द गर्नुहोस् ।’

ग्राउण्ड ह्याण्डलिङ नीति निर्माता र कार्यकारीको सरोकारको कुरा भएको मन्त्री किरातीको भनाइ थियो । त्यो कसरी गर्ने भन्ने कुरा प्रधानमन्त्री, ठूला राजनीतिक दलको कुरा भएको उनले बताए । ’वायुसेवा निगम अहिले चाहिन्छ । त्यसलाई बचाउनको निम्ति ग्राउण्ड ह्याण्डलिङ चाहिन्छ । यही नै हो बटम लाइन । भोलि अर्को निर्णय नभइन्जेलसम्म अन्यथा यहाँहरूले यस विषयमाथि कुरा उठाउनुभयो भने त्यो नेतृत्वमाथि, नीतिमाथिको हस्तक्षेप हुन जान्छ, त्यो सह्य हुँदैन,’ उनले भने, ’आजको दिनदेखि यो अन्त्य, पूर्णविराम हुनुपर्छ । यो कुरा नउठाउनका लागि म गम्भिरताका साथ तपाईहरूलाई निर्देशन गर्छु । अन्यथा यति गरेर पनि तपाईहरूले उठाउनुभएछ भने त्यो राम्रो हुँदैन भन्नेकुरा तपाईहरूले बुझ्नुहोला ।’

वायुसेवा निगमको जिवन नै ’ग्राउण्ड ह्याण्डलिङ’मा रहेको भन्दै मन्त्री किरातीले असन्तुष्टि जनाए । उनले वायुसेवा निगमलाई कसले डुबाएको हो भन्ने प्रश्न गरेका थिए । अब सच्याउनुपर्ने अवस्थामा वायुसेवा निगम आएको उनले बताए । ’वायुसेवा निगमको पुनःसंरचना गरौँ । विधि, विधानमा के–के समस्याहरू हुन्छन् तिनीहरूलाई सच्याउँला । तर, नीति र नेतृत्वभन्दा माथि गएर जब तपाईहरूले कुरा उठाउनुभयो भने यो राम्रो हुँदैन भन्नेकुरा कडाइका साथ म भन्न चाहन्छु,’ उनले भने ।