बालकुमारी घटनालाई गम्भिर रुपमा लिएर छानबिन गराउने गठबन्धनको निर्णय

१५ पुस, काठमाडौं । सत्ता गठबन्धनमा रहेका दलहरुले बालकुमारी घटनाबारे छानबिन गर्न उच्चस्तरीय आयोग बनाएर जाने सहमति गरेका छन् । गठबन्धनले सरकारले गठन गर्ने उच्चस्तरीय आयोगलाई पूर्ण रुपमा सहयोग गरी चाँडो निक्ष्कर्षमा पुर्याउन दवाव दिने भएको छ । 

सत्ता साझेदार दलका शीर्ष नेताहरुसँग आइतबार भएको छलफलपछि प्रधानमन्त्री पुष्पकमल दाहाल प्रचण्डले छानबिन आयोग ऐन २०२६ अनुसार पूर्वन्यायाधीशको अध्यक्षमा उच्चस्तरीय आयोग बनाउने निर्णय भोलीको मन्त्रिपरिषद बैठकबाट गराउने जानकारी दिए ।

भोलि विहान बस्ने मन्त्रिपरिषद् बैठकले आयोग गठन गर्ने विषय छलफलमा भएको बैठकमा सहभागी कांग्रेस प्रमुख सचेतक रमेश लेखकले बताए । उनले आयोगले भोलिदेखि नै कार्य प्रारम्भ गर्ने जानकारी दिए । कोरियाली भाषा परीक्षाको फारम भर्न पाउनुपर्ने माग गर्दै आन्दोलनमा उत्रिएका युवामाथि गत शुक्रबार ललितपुरको बालकुमारीमा प्रहरीले अत्यधिक बल प्रयोग गर्दा दुई जनाको मृत्यु भएको थियो ।