राष्ट्रियसभा सदस्यको सीट भागबण्डाका विषयमा एमालेसँग छलफल गर्न कांग्रेस र माओवादी सहमत

१८ पुस, काठमाडौं । राष्ट्रियसभा सदस्यको यो निर्वाचनमा प्रमुख प्रतिपक्षी दल नेकपा एमाले सातै प्रदेशमा निल हुने भएपछि नेपाली कांग्रेस र नेकपा माओवादीले सीट भागबण्डामा एमालेसँग सहकार्य गर्ने सहमति गरेका छन् । यसअघि एमालेले कांग्रेससंग सहकार्यको प्रस्ताव पठाएको थियो । 

एमालेले कांग्रेस र एमाले मिलेर जाँदा सहज हुने भन्दै आफूलाई १३ सीट राखेर ७ सीट दिन प्रस्ताव गरेको थियो । तर, गठबन्धनमा समस्या आउने भन्दै कांग्रेस सभापति शेरबहादुर देउवाले एमालेको प्रस्ताव अश्विकार गरेका थिए । राष्ट्रियसभा सदस्यको सीटमा सहकार्यबारे एमालेले प्रधानमन्त्री पुष्पकमल दाहाल प्रचण्डसँग पनि छलफल गरेको थियो । 

मंगलबार विहान पनि प्रधानमन्त्री प्रचण्ड र एमाले अध्यक्ष केपी शर्मा ओलीबीच छलफल भएको थियो । बुधबार विहान कांग्रेस र माओवादीका नेताहरुको बैठकमा प्रधानमन्त्रीले एमालेसँग पनि सहकार्यका लागि छलफल गरौ भन्ने प्रस्ताव गर्दा कांग्रेसले स्वीकार गरेपछि आजै साझ एमालेसहित गठबन्धनका नेताहरुको बैठक बोलाइएको छ । सत्ता गठबन्धनका नेताहरुले प्रमुख प्रतिपक्षी दल एमालेसँग पनि छलफल गरेर सीट संख्या टुंगो लगाउने पक्षमा पुगेका छन् । 

आज बिहान प्रधानमन्त्री निवास बालुवाटारमा प्रधानमन्त्री प्रचण्डले नेपाली कांग्रेसका नेताहरुसँग छलफल गरेका थिए । यो छलफलपछि आजै कांग्रेस, माओवादी, जसपा र एकीकृत समाजवादीको संयुक्त बैठक अपराह्न तीन बजे बोलाइएको छ । गठबन्धनको बैठकपछि साँझ ५ बजे नेकपा एमालेसँग संयुक्त बैठक बस्ने भएको हो । 

बुधबार बिहानको छलफलमा नेपाली कांग्रेसका सभापति शेरबहादुर देउवा, नेता पूर्णबहादुर खड्का, महामन्त्री गगन थापा र प्रमुख सचेतक रमेश लेखक सहभागी थिए । यसैगरी नेकपा माओवादी केन्द्रको तर्फबाट वरिष्ठ उपाध्यक्षसमेत रहेका उपप्रधान एवम् गृहमन्त्री नारायणकाजी श्रेष्ठ, उपमहासचिव वर्षमान पुन लगायतका नेताहरु सहभागी थिए ।