एमाले छिरेपछि सत्ता गठबन्धनमा खटपट, ओलीको प्रस्तावमा सहमति नबन्दा बैठक अनिर्णीत

१९ पुस, काठमाडौं । नेकपा एमालेलाई राष्ट्रियसभामा साथ लिएर जाने नेपाली कांग्रेसका सभापति शेरबहादुर देउवा र प्रधानमन्त्री पुष्पकमल दाहाल प्रचण्डको रणनीति पेचिलो बनेर गएको छ । यसले गर्दा राष्ट्रियसभाको सिट बाँडफाँटको विषयमा बिहीबार बिहान बसेको सत्ता गठबन्धनको बैठक निष्कर्षविहीन भएको छ ।

प्रधानमन्त्री निवास बालुवाटारमा बसेको बैठकमा नेकपा एमालेसँग सिट बाँडफाँट गर्ने विषयमा एकीकृत समाजवादीका अध्यक्ष माधव कुमार नेपालले विरोध जनाएपछि बैठक निष्कर्षमा पुग्न नसकेको हो । बिहान कुनै सहमति नजुटेपछि आजै बेलुका फेरि प्रधानमन्त्री एवम् माओवादी केन्द्रका अध्यक्ष प्रचण्ड, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओलीको संयुक्त बैठक बस्ने बताइएको छ । 

आजको बैठकमा एमालेलाई पनि सिट बाँडफाँट गर्ने कुरा सैद्धान्तिक रुपमा पनि रणनीतिक रुपमा पनि गलत छ भनेर माधव नेपाल कडा रुपमा प्रस्तुत भएका थिए । बुधबारको बैठकमा नेकपा एमालेका अध्यक्ष ओलीले राष्ट्रियसभामा केही सिटमा भाग खोजेका थिए । प्रधानमन्त्री प्रचण्डले, ओलीले आफूहरुलाई राष्ट्रियसभामा शून्य नबनाउन भनेको बैठकका सहभागीहरुलाई सुनाएका थिए । एमालेले प्रस्ताव ल्याएपछि त्यसमा छलफल गर्ने र सिट बाँडफाँटको टुंगो लगाउने भन्दै बैठक बिहीबार बिहानसम्मका लागि स्थगित भएको थियो ।

यद्यपि बिहीबार बिहानको बैठकमा शीर्ष नेताहरुले कुन–कुन दललाई कति–कति सिट भाग लगाउने भन्ने विषय सार्वजनिक गरेनन् । नेपाली कांग्रेसका प्रमुख सचेतक रमेश लेखकले सत्ता गठबन्धनभित्र राष्ट्रियसभा सदस्य निर्वाचनबारे सिट बाँडफाँटमा अझै सहमति जुट्न नसकेको बताए । सत्ता गठबन्धनमा आबद्ध चार दलका नेताहरूको बैठकले सिट बाँटफाँटको विषय टुंग्याउन नसकेको हो ।

बैठकपछि सञ्चारकर्मीसँग कांग्रेसका प्रमुख सचेतक लेखकले नेताहरूका बीचमा छलफल भएको तर सिट बाँटफाँटको विषय टुंगिन नसकेको बताए । आज साँझ वा शुक्रबार बिहान पुनः बस्ने गरी बैठक सकाइएको उनले जानकारी दिए ।

“एमालेसँगको संवाद पनि समसामयिक विषयमा जारी रहन्छ, गठबन्धनको संवाद पनि जारी रहन्छ । गठबन्धनका राजनीतिक दलहरूका बीचमा राष्ट्रियसभाकै विषयलाई केन्द्रमा राखेर छलफल भइरहेको छ, उनले भने, एमालेसँग समग्रतामा समसामयिक विषयमा छलफल भइरहेको छ ।