सामुदायिक विकास परियोजना अन्तर्गत भारतले २० करोडसम्म खर्च गर्न सक्ने सम्झौतामा हस्ताक्षर

१९ पुस, काठमाडौं । भारत सरकारले नेपाल सरकारलाई दिँदै आएको सामुदायिक विकास परियोजना ( एचआइसिडिपी) अन्तर्गत अब सिधै २० करोडसम्म खर्च गर्न मिल्ने गरि बिहीबार सम्झौतापत्रमा हस्ताक्षर भएको छ । नेपालस्थित भारतीय दूतावासले परियोजनामा सिधै खर्च गर्ने रकम बढाएर २० करोड पुर्याइएको हो । 

भारतले नेपाललाई प्रदान गर्दै आएको उच्च प्रभाव सामुदायिक विकास परियोजना (एचआइसिडिपी) अन्तर्गतको रकम २० करोड रूपैयाँ  पुर्याउने सम्झौतामा हस्ताक्षर भएको हो । सम्झौतामा नेपालका तर्फबाट अर्थसचिव कृष्णहरि पुष्कर र भारतका तर्फबाट नेपालका लागि भारतीय राजदूत नवीन श्रीवास्तवले हस्ताक्षर गरेका छन् ।

नेपालका परराष्ट्र मन्त्री एनपी साउद र भारतका विदेशमन्त्री एस जयशंकरको उपस्थितिमा सम्झौतामा हस्ताक्षर भएको हो । यसअघि भारतीय दूतावासले एचआइसिडिपी अन्तर्गत पाँच करोडसम्म सिधै परियोजनामा खर्च गर्न पाउने नियम थियो । भारतले यो रकम नेपालस्थित भारतीय दूतावासमार्फत् सिधै खर्च गर्न पाउँछ । परियोजनाहरू आफैं छनौट र तिनको कार्यान्वयन पनि आफैं गर्नेछ । 

मन्त्रिपरिषदको गत मंसिर २१ को बैठकले एचआइसिडिपी अन्तर्गतको सहयोग स्वीकार गर्ने निर्णय गरेको थियो । नेपाल सरकारले मंसिरमा सैद्धान्तिक सहमति दिएपछि भारतले सहयोगको प्रस्ताव गरेको थियो । सुरूमा भारतले २४ करोड रूपैयाँ सहयोग गर्ने प्रस्ताव गरे पनि नेपालका प्रधानमन्त्री, अर्थमन्त्री र परराष्ट्रमन्त्रीले परामर्श गरेपछि अहिले २० करोड रूपैयाँ स्वीकार गर्ने सहमति बनेको थियो ।