रितपुर्वक निवेदन नदिएर झोलामा खोला ओगटिरहेका १५ आयोजना पीपीएको रोलक्रम बाहिर

२० पुस, काठमाडौं । नेपाल विद्युत् प्राधिकरणले विद्युत् खरिद बिक्री सम्झौता (पीपीए)गर्ने रोलक्रमबाट १५ वटा आयोजनालाई हटाएको छ । तोकिएको अवधिभित्र निवेदन प्राप्त नभएको, प्राप्त निवेदनमा रितपूर्वक आवश्यक कागजात र दस्तावेज संलग्न भएकाले पीपीएको प्रक्रिया अगाडि बढाउन नसकिने प्राधिकरणले जनाएको छ ।

आवश्यक कागजात नबुझाएका ती आयोजना अधिकांश नदी प्रवाही प्रकृतिका छन् । विद्युत् व्यापार विभागका अनुसार ती आयोजनाको कूल क्षमता दुई सय १५ मेगावाट छ । प्राधिकरणले माथिल्लो त्रिशूली दोस्रो, एक सय दुई मेगावाट, चमेलिया छटिगाड ८५ मेगावाटलगायत आयोजना छन् । ती आयोजनालाई रोलक्रमबाट हटाएपछि प्राधिकरणले छवटा आयोजनाको पीपीए प्रक्रियामा आउन आग्रह गरिएको छ । ती आयोजनाको क्षमता दुई सय २८ मेगावाट बराबर छ । 

प्राधिकरणले आगामी १५ दिनभित्र प्राधिकरणका सम्पर्क राख्न सूचित गरेको छ । प्राधिकरणको २०७९ साल माघ २६ को नौ सय ३० औँ बैठकले नदी प्रवाही आयोजनाको अधिकतम सीमा छ हजार सात सय ५० मेगावाट नपुगेसम्म ग्रीड ‘कनेक्सन एग्रिमेन्ट’को रोलक्रमका आधारमा पीपीए गर्ने क्रममा रहेका आयोजनालाई प्राथमिकता दिने निर्णय गरेको थियो ।  

प्राधिकरणले २६ माघ २०७९ मा आओआरतर्फ अधिकतम सीमा ६ हजार ७५० मेगावाट नपुगेसम्म ग्रिड कनेक्सन एग्रिमेन्टको रोलक्रमका आधारमा आयोजनाको पीपीए गर्ने क्रममा यसको प्रक्रिया अगाडि बढ्न नसकेका आयोजनालाई सम्पर्कमा ल्याउने निर्णय गरेको थियो ।

सोही निर्णय अनुसार १६ असोजमा ३५ दिने सूचना जारी गरी सम्पर्कमा आउन भनिएको थियो । सो अवधिमा पीपीएका लागि निवेदन नदिएका र कागज संलग्न गर्न नसकेका २१५.२२९ मेगावाट क्षमताका १५ वटा आरओआर आयोजनालाई पीपीएको रोलक्रमबाट हटाइएको छ ।

प्राधिकरणको १२ पुसमा बसेको बैठकले यस्तो निर्णय गरेको हो । यसरी हटाइएका आयोजनामा अपर त्रिशूली २, चमेलिया, गच्र्याङखोला, लोअर तारा, मध्यसुनकोशी, ल्याङ्दी खोला, ताडी खोला, ढाड खोलालगायतका परियोजना छन् ।

प्राधिकरणले २१५ मेगावाट क्षमताका आयोजनालाई रोलक्रमबाट हटाएकोमा २२८.८५८ मेगावाट क्षमताका ६ वटा आयोजनालाई भने रोलक्रममा समावेश गरेको छ । प्राधिकरणका अनुसार यसरी समेटिएका ६ आयोजनामा संखुवाखोला, हङगु खोला, अप्सुवा खोला १, माथिल्लो अप्सुवा खोला, सुपर सेती र घुन्सा खोला रहेका छन् ।

ग्रिड कनेक्सन एग्रिमेन्ट सम्पन्न भएको रोलक्रमका आधारमा यी आयोजनाको पीपीए प्रक्रिया अगाडी बढाइएको प्राधिकरणले जनाएको छ । यी आयोजनाले अब आवश्यक कागजात पुरा गरी प्राधिकरणमा सम्पर्क गर्नु पर्ने भएको छ ।