कुकुरले टोकेर खाद्यका २० वटा च्यांग्रा मार्यो, १४ घाइते

२० पुस, काठमाडौं । नेपाल खाद्य व्यवस्था तथा ब्यापार कम्पनीको थापाथलीस्थित गोदाममा राखिएका २० वटा च्याङ्‍ग्रा कुकुरले टोकेर मारेको जनाइएको छ । बुधबार राती एक्कासी कुकुरको हुल गोदामभित्र छिरेर च्यांग्रा मारेको खाद्य व्यवस्था तथा व्यापार कम्पनीको थापाथलीले जनाएको छ । 

गोदामको च्याङ्‍ग्रा खोरमा बुधबार मध्यराति एकाएक कुकुरको समूह छिरेर जथाभावी रूपमा च्यांग्रालाई टोकेको हो । एक घण्टाभित्र २० वटा च्याङ्‍ग्रा मारेको र १४ वटालाई घाइते बनाएको खाद्यको भनाइ छ । गोदाममा ४७ वटा च्याङ्‍ग्रा थिए । तिनमा १३ वटा च्यांग्रा घाइते भेटिएको  खाध्यको भनाइ छ ।  

दसैंलाई भनेर कम्पनीले रसुवाबाट ल्याएका यी च्याङ्‍ग्रा तिहार र छठमा समेत नबिकेर यत्तिकै राखिएका थिए । पटकपटक मूल्य घटाउँदा पनि नबिकेका यी च्यांग्रा अहिले कुकुरको सिकार बनेका हुन् ।  खाद्यको सीसीटीभी हेर्दा बेलुका राम्रैसँग घाँसपानी खाएका च्यांग्रालाई रातिमा कुकुरले आक्रमण गरेको देखिन्छ, कुकुरको आक्रमणबाट २० च्याङ्‍ग्रा मरेको र १४ वटा घाइते भएको मुचुल्का खाद्यले बनाएको छ । 

१३ च्यांग्रा मात्र अब बाँकी छन् । च्यांग्राको तौल २५ देखि ३२ किलो छ । खाद्यले प्रतिकिलो ११ सय २५ रुपैयाँ मूल्य तोकेको थियो । यसअनुसार औसतमा २८ किलोका दरले खाद्यलाई करिब १५ लाख नोक्सानी हुने देखिन्छ । खाद्यले गत दसैंका लागि २ हजार २ सय १२ वटा खसीबोका र च्यांग्रा उपत्यका ल्याएको जनाएको छ । तीमध्ये रसुवाबाट ल्याइएका ५ सय ४२ वटा च्याङ्‍ग्रा बाँकी थिए ।