त्रिविमा उपकुलपति नियुक्ति गर्न मागिएको दरखास्त विवादमा, अर्को सूचना निकाल्न प्रधानमन्त्रीको निर्देशन

२० पुस, काठमाडौं । सरकारले त्रिविमा उपकुलपति नियुक्त गर्न जारी गरेको सूचना विवादमा परेको छ । उक्त सूचनाको आलोचना भएपछि प्रधानमन्त्री पुष्पकमल दाहाल प्रचण्डले त्रिभुवन विश्वविद्यालयले उपकुलपतिको नियुक्ति प्रक्रियाका लागि आह्वान गरेको विज्ञापनका प्रावधान सच्चाएर अर्को सूचना निकाल्न निर्देशन दिएका छन् ।

प्रधानमन्त्रीले माओवादी निकट पूर्वरजिष्ट्रार तथा राष्ट्रिय परीक्षा बोर्डका पूर्व अध्यक्ष चन्द्रमणि पौडेललाई ल्याउन चाहेको भन्दै विरोध सुरु भएपछि शिक्षा, विज्ञान तथा प्रविधिमन्त्री एवं विश्वविद्यालयका सहकुलपति अशोककुमार राईलाई आफ्नै कार्यकक्षमा बोलाएर उक्त विज्ञापन सच्चाउन निर्देशन दिएका हुन् । 

प्रधानमन्त्रीले आफूले विश्वविद्यालयको सुधारका निम्ति संसारभरि रहेका नेपालीमध्येबाट योग्य मान्छे आओस् भनेर खुला प्रतिस्पर्धा गराउन खोजेकोमा शुक्रबार प्रकाशित गरिएको सूचनाले योग्य मान्छेहरू छनोटमा ढोका बन्द हुनसक्ने भन्दै त्यस्तो त्रुटिपूर्ण प्रावधान सच्चाएर अर्को सूचना निकाल्न उनले निर्देशन दिएका हुन् ।

प्रधानमन्त्रीको सचिवालयले दिएका जानकारी अनुसार शुक्रबार छनोट तथा सिफारिस समितिको तर्फबाट प्रकाशित सूचनामा ‘विश्वविद्यालयको पदाधिकारीमध्ये कुनै एक पदमा कम्तीमा तीन वर्ष काम गरेको (वर्ष, महिना र दिनसमेत) व्यहोरा खुलेको विवरण प्रमाणित प्रतिलिपि’ पेश गरेको सूचना निकालेपछि त्यसको विरोध भएपछि अर्को सूचना निकाल्न निर्देशन दिइएको हो ।