डेडिकेटेड र ट्रंकलाइन विवादलाई इज्जतको प्रश्न बनाउने काम भयो, अब सरकारले हस्तक्षेप गर्छः अर्थमन्त्री

२१ पुस, काठमाडौं । अर्थमन्त्री डा. प्रकाशशरण महतले डेडिकेटेड र ट्रंकलाइन विवादलाई इज्जतको प्रश्न बनाएर थप समस्यामा पुर्याउने काम भएको बताएका छन् । उनले नेपाल विद्युत प्राधिकरण र उद्योगीबीचको यो विवादमा सरकारले हस्तक्षेप गर्ने बताएका छन् । सरकार अब चुप लागेर बस्न नमिल्ने र विवाद मिलाउन अग्रसर हुने उनको भनाइ छ ।  

काठमाडौंमा आयोजित एक कार्यक्रमलाई सम्बोधन गर्दै उनले उद्योगीहरुको विद्युत लाइन काटेको कुरालाई सरकारले चाँडै टुंगो लगाउने बताए । उनले विद्युत लाइन काट्ने कुराले धेरै उद्योग, व्यवसाय प्रभावित भएको गुनासो आइरहेकाले यसको चाँडै समाधान निकाल्ने बताए । डेडिकेटेड र ट्रंकलाइन विवादलाई इज्जतको प्रश्न बनाउन नहुनेमा जोड दिएका अर्थमन्त्री महतले भने, डेडिकेटेड र ट्रंकलाइन विवादको विषय थप अन्योल बनाएर लाने छुट कसैलाई छैन ।  

अर्थमन्त्री महतले अर्थतन्त्र बिस्तारै चलायमान भइरहेको समयमा डेडिकेटेड र ट्रंकलाइनको विवाद आउँदा धेरै उद्योगी व्यवसायीहरू मारमा परेको भन्दै यसले सरकारको राजश्वमा पनि प्रभाव पार्ने बताए । धरै उद्योगहरू नचल्दा त्यहाँका कामदारहरूमा पनि समस्या आउँछ, धेरै दिन राखेर कसैलाई पनि फाइदा छैन, अब सरकारले आवश्यक निर्णय लिनुपर्छ ।