म्याग्दीमा ढुंगाले हानेर ७० वर्षीया वृद्धाको हत्या, दुई जना घाइते

२१ पुस,  म्याग्दी । म्याग्दीको मालिका गाउँपालिका–७ मा आज दिउँसो धारिलो ढुङ्गा 'छपनी' प्रहार गरेर एकको हत्या भएको छ भने दुई जना घाइते भएका छन्।

छपनी प्रहार हुँदा मालिका–७ बिमवाङकी ७० वर्षीया मनिषा गर्बुजाको घटनास्थलमै मृत्यु भएको प्रहरीले जनाएको छ ।  प्रहरीका अनुसार मनिषाकी सात वर्षीया नातिनी प्रियङ्का गर्बुजा र छिमेकी ६६ वर्षीया अमृता जुग्जाली घाइते भएका छन्।

मनिषालाई छपनी प्रहार गरेको देखेर बचाउन गएका प्रियङ्का र अमृतालाई चिर्पट प्रहार गरेर घाइते बनाइ भागेका स्थानीयको भनाइ छ। घाइते दुवैलाई थप उपचारका लागि दरवाङबाट हेलिकप्टरमा पोखराको मणिपाल शिक्षण अस्पताल लगिएको छ ।  

प्रियङ्काको अवस्था गम्भिर रहेको प्रहरीले जनाएको छ। एक जना शंकास्पद व्यक्तिलाई नियन्त्रणमा लिइएको पनि प्रहरीले बताएको छ ।