सीट भागबण्डा मिलाउन गठबन्धनको बैठक बालुवाटारमा

२२ पुस, काठमाडौं । राष्ट्रिय सभा सदस्य निर्वाचनका लागि सीट भागबण्डा टुंग्याउन गठबन्धनका शीर्ष नेताहरू जुटेका छन् । प्रधानमन्त्रीको सरकारी निवास बालुवाटारमा चार दलको बैठक बसिरहेको छ । बैठकमा प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा, नेकपा एकीकृत समाजवादी पार्टीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादवसहित चार दलका नेताहरू सहभागी छन् । 

बैठकमा राष्ट्रिय सभा सदस्य निर्वाचनमा सिट बाँडफाँट गर्ने विषयमा छलफल भइरहेको छ । शनिबार बसेको बैठकमा कांग्रेसले १०, माओवादी केन्द्रले ६, एकीकृत समाजवादीले २ र जसपाले १ सिट लिने गरी सहमतिको खाका भएको थियो । तर एकीकृत समाजवादीले त्यो खाकामा असन्तुष्टि जनाउँदै २ सीट दिने भए अध्यक्ष दिनुपर्ने माग राखेको छ ।  

अहिलेको बैठकले सकेसम्म एकीकृत समाजवादीलाई मनाउने र सहमतिको प्रयास गर्ने नेताहरूले जनाएका छन् । ‘सकेसम्म एकीकृत समाजवादीलाई मनाएर अघि बढ्ने प्रयास हुन्छ । नभए माओवादी केन्द्रले एक सिट छोड्नु पर्ने हुनसक्छ,’ बैठकमा सहभागी एक नेताले भने । राष्ट्रिय सभामा १९ सिटका लागि आगामी माघ ११ गते निर्वाचन हुँदै छ भने त्यसका लागि सोमबार मनोनयन दर्ता गर्ने कार्यतालिका छ ।