गठबन्धनभित्र राष्ट्रियसभाको सीट संख्यामा मोटामोटी सहमति, कांग्रेसले लियो १० सीट

२२ पुस, काठमाडौं । सत्ता गठबन्धनभित्र राष्ट्रियसभा सदस्यको सटी बाँडफाँटबारे मोटामोटी सहमति भएको छ । १९ पदका लागि गठबन्धनबीच भागबन्डाको सहमति भएको कांग्रेस नेता रमेश लेखकले बताएका छन् ।

भागबन्डाअनुसार नेपाली कांग्रेसले १०, नेकपा (माओवादी केन्द्र) ले ६, नेकपा (एकीकृत समाजवादी)ले दुई र जनता समाजवादी पार्टी (जसपा)ले एक सीट पाउने तय भएको छ । 

क्लष्टरको विषय भने टुंगिन बाँकी छ । केही घण्टाभित्रै त्यो टुंगो लाग्ने लेखकले बताए । त्यसमा एकीकृत समाजवादीले मानेको छैन । उसले आफूले ३ सिट पाउनुपर्ने अडान राखेको छ ।

आइतबार बिहान प्रधानमन्त्री निवास बालुवाटारमा पनि एकीकृत समाजवादीका नेताहरुले तीन सिट पाउनुपर्ने आफूहरुको बटमलाइन भएको महासचिव घनश्याम भुसालले भने । एकीकृत समाजवादीले ३ सिट लिने अवस्था बन्यो भने कांग्रेस वा माओवादीकको एक सीट घट्ने देखिएको छ । 

गठबन्धनमा राष्ट्रपतिले मनोनीत गर्ने सीट जनमोर्चालाई दिने भन्ने छलफल चलेको छ । तर, सहमति भएको छैन । राष्ट्रपतिबाट मनोनीत एकसहित राष्ट्रियसभा २० सदस्यको पदावधि फागुन २० मा सकिँदैछ । १९ सिटका लागि २३ पुसमा उम्मेदवारी दर्ता र ११ माघमा निर्वाचन मिति तोकिएको छ ।

राष्ट्रिय सभाको सिट बाँडफाँटका लागि सत्तारुढ दलहरुको बैठक निरन्तर बस्दै आएको छ । आइतबार बिहान बसेको बैठकमा एकीकृत समाजवादीले पाउने सिट बारे सहमति जुट्न बाँकी छ । कांग्रेसले १०, माओवादी ६, एकीकृत समाजवादीले २ र जनता समाजवादीले एक सिट लिने प्रस्ताव छ । तर एकीकृत समाजवादीले ३ सिट पाउनुपर्ने अडान राखेका कारण सहमति हुन सकेको छैन ।