सीट भागबन्डामा कुरा नमिलेपछि गठबन्धन छोड्छु भन्दै उठेका माधव नेपालले बोलाए पार्टीको बैठक

२२ पुष, काठमाडौं । नेकपा एकीकृत समाजवादीका अध्यक्ष माधवकुमार नेपालले आकस्मिक भन्दै  पार्टीको बैठक बोलाएका छन् । सत्ता गठबन्धनमा राष्ट्रियसभा सदस्यको ३ सीट नपाएपछि उनी बालुवाटार बैठकबाट बाहिरिएका थिए । पार्टीका नेताहरुलाई गठबन्धन छाड्ने कि के गर्ने भन्ने विषयमा छलफल गर्न उनले पार्टीको बैठक बोलाएको बताइएको छ । 

गठबन्धनको बैठकमा एकीकृत समाजवादीले ३ सीट मागेको थियो । तर, २ सीट मात्र दिने भनेपछि उनले उसो भए एक मन्त्री दिनुस भनेर मागेका थिए । तर, मन्त्रीकाबारे छलफल भएन । २ सीट मात्र पाउने भए एक मन्त्री थप पाउनुपर्ने नेपालको माग छ ।  पार्टी मुख्यालय आलोकनगरमा केही बेरमा बैठक बस्ने प्रवक्ता जगन्नाथ खतिवडाले बताए ।

राष्ट्रियसभाको १९ सीटमा कांग्रेसलाई १०, माओवादीलाई ६, नेकपा एसलाई २ र जसपालाई १ सीट दिने सहमति बनेको कांग्रेस नेता रमेश लेखकले दाबी गरेका छन् । तर, नेकपा एसले त्यो गठबन्धनले भाग लगाइदिएको भएपनि आफूहरूको सहमति नरहेको बताएको छ । बैठकपछि  नेकपा समाजवादीले कस्तो निर्णय गर्छ त्यो भने हेर्न बाँकी छ ।