१० सीटमा उम्मेदवार छान्न कांग्रेसमा चटारो, सानेपाको बैठक सारेर धुम्बाराहीमा नेताहरुको जमघट

२२ पुस, काठमाडौं । गठबन्धनबाट भागबण्डामा १० सीट लिएर आन्तरिक छलफलमा जुटेका नेपाली कांग्रेसका सभापति शेरबहादुर देउवालाई कलस्टर र असन्तुष्ट पक्षलाई मिलाएर राष्ट्रिय सभा सदस्यका लागि उम्मेदवारको टुंगो लगाउन सकस परेको छ । केहीबेर अघि पार्टीको असन्तुष्ट पक्षसँग छलफल गरेका सभापति देउवा यतिबेला धुम्बाराहीमा नेताहरूको घेराबन्दीमा छन् । 

दिउँसो १ बजेका लागि बोलाइएको केन्द्रीय कार्यसम्पादन समितिको बैठक अपरान्ह ४ बजेका लागि सारेर अहिले देउवा धुम्बाराहीमा नेताहरूसँग छलफल गरिरहेका छन् । गठबन्धनको बैठक सकाएर नेताहरू सभापति शेरबहादुर देउवा धुम्बाराहीमा बैठक बसिरहेका हुन् । 

राष्ट्रिय सभा निर्वाचनका लागि उमेदवार चयनको विषयमा बैठक बोलाइएको हो । बैठक शनिबारका लागि बोलाइएको थियो । तर, शनिबार पनि सारेर बैठक आइतबारका लागि बोलाइएको हो । आइतबार १ बजे बस्ने भनिएको बैठक सारेर नेताहरूले ४ बजे पुराएका छन् । हाल सभापति देउवा निवासमा इतर समूहका नेता शेखर कोइराला, महामन्त्री गगनकुमार थापा, प्रमुख सचेतक रमेश लेखक, उपसभापति पूर्णबहादुर खड्का लगायत बैठक बसिरहेका छन् । 

अन्य नेताहरू बाहिर बसेर प्रतीक्षा गरिरहेका छन् । अहिले नेताहरू अनौपचारिक बैठकमा हुनुहुन्छ । त्यसैले बैठक सरेर दिउँसो ४ बजे पुगेको हो,” प्रचार विभाग प्रमुख मीन विश्वकर्माले भने । गठबन्धनमा कांग्रेसले १० सिट गठबन्धनबाट पाएको छ । उक्त १० सिटमा देउवाले कम्तीमा ६ सिट आफूसँग राख्ने नेताहरूसँग बताइसकेका छन् । इतर समूहको माग ४ सिटको रहेको छ ।