देउवाले तीन सीट मात्र दिन्छु भनेपछि आफू पक्षका नेता बोलाएर शेखर पुगे बिशालनगर

२२ पुस, काठमाडौं । राष्ट्रिय सभाका उम्मेदवारका विषयमा छलफल गर्न नेपाली कांग्रेसका नेता डा. शेखर कोइरालाले आफू पक्षका नेतालाई बोलाएका छन् । सभापति शेरबहादुर देउवासँग कुरा नमिलेपछि नेता डा.शेखर कोइराला र महामन्त्री गगन थापाले आफ्नो समूहको बैठक बोलाएका हुन् । 

गठबन्धनको बिहानको बैठक पछि नेता कोइराला र महामन्त्री थापा सभापति देउवासँग छलफल गर्न धुम्बाराही गएका थिए । उक्त बैठकमा संख्या, मापदण्ड, योगदान लगायतका विषयमा छलफल भएको थियो । भौगोलिक तथा जातीय, क्षेत्रीय सन्तुलन समेतलाई ध्यान दिइने बैठकको निर्णय थियो । अवसरबाट वञ्चित भएका योग्य तथा लोकप्रिय व्यक्तिलाई प्राथमिकता दिने पार्टीकाे निर्णय छ । तर, सभापति देउवाले उम्मेदवार बनाउँदा पार्टीले गरेका निर्णय लत्याउन लागेको शेखर पक्षको आरोप छ ।

पार्टीभित्रको भागवण्डा, मापदण्ड लगायतमा सभापतिसँग कुरा नमिलेपछि शेखर कोइराला विशालनगरस्थित सम्पर्क कार्यालयमा पुगेका छन् । देउवासँग कुरा नमिलेपछि आफ्नो समूहका शीर्ष नेताहरूलाई छलफलका लागि डाकिएको छ ।  नेताहरूलाई बैठकमा बोलाइएको संस्थापन इतरका नेता डा. गोविन्द पोखरेलले जानकारी दिए ।

कांग्रेसले आज नै कार्यसम्पादन समितिको बैठक बोलाएको छ । दिउँसो १ बजेको बैठक अपरान्ह ४ बजेका लागि सारिएको छ । गठबन्धनका दलबाट कांग्रेसले १० उम्मेदवार राष्ट्रिय सभामा उठाउने भएको छ ।