पूर्वन्यायाधीश पौडेलको नेतृत्वमा बनेको आयोगले काम थालेपछि डीआईजीको समिति खारेज

२२ पुस, काठमाडौं । बालकुमारी घटनाको छानबिन गर्न बनाइएको लालमणि आचार्यको नेतृत्वमा गठित समिति खारेज भएको छ । प्रहरीको दमनबारे छानविन गर्न प्रहरीकै नेतृत्वमा छानविन समिति बनाएको भन्दै सरकारको विरोध भएपछि उक्त घटनाको छानविन गर्न पूर्वन्यायाधीश शेखर पौडेलको नेतृत्वमा ३ सदस्यीय आयोग गठन गरिएको थियो । 

यो आयोगले काम सुरु भएपछि डीआईजी नेतृत्वको समिति विघटन गरिएको हो । बालकुमारी घटनामा सुरक्षाकर्मीको दमनबाट दुई युवकको मृत्यु भएको थियो । उक्त घटना जाँचबुझ गर्न गठित आयोगले हिजोबाटै काम सुरु गरेको जनाएको छ ।  यसअघि बसेको मन्त्रिपरिषद बैठकले पूर्वन्यायाधीश शेखर पौडेलको नेतृत्वमा ३ सदस्यीय आयोग गठन गरेको हो । 

आयोगमा पूर्व प्रहरी अतिरिक्त महानिरीक्षक अरुण बिसी र सह–सचिव नारायणप्रसाद भट्टराई सदस्य छन् । जाँचबुझ आयोगले काम थालेसँगै यसअघि गृह मन्त्रालयले बनाएको समिति विघटन भएको हो । घटना छानबिन गर्न प्रहरी नायव महानिरीक्षक लालमणि आचार्यको नेतृत्वमा गठित समिति विघटन गरिएको गृह मन्त्रालयले जानकारी दिएको छ । 
 
डीआईजी आचार्य नेतृत्वको समितिमा राष्ट्रिय अनुसन्धान विभागका उप–अनुसन्धान निर्देशक वासु सिग्देल र ललितपुरका सहायक प्रमुख जिल्ला अधिकारी अमरदीप सुनुवार सदस्य थिए । छानबिन समितिले गरेको छानबिनको प्रारम्भिक विवरण र कागजात गृह मन्त्रालयमा हस्तान्तरण गरेको छ ।  
 
पूर्वन्यायाधीश पौडेल नेतृत्वको आयोगले पुस २० बाट घटनाको जाँचबुझ सुरु गरेको छ । आइतबार ग्वार्कोस्थित ईपिएस कोरिया शाखामा गएर आयोगका पदाधिकारीले सोधपुछ गरेका छन् । पुस १३ मा रोजगार अनुमति प्रणाली (इपिएस) मार्फत कोरियामा काम गर्न जान खोज्नेहरूले प्रदर्शन गरेका थिए ।  प्रदर्शनमा दैलेख घर भएका सुजत रावत र अछामका वीरेन्द्र शाहको मृत्यु भएको थियो ।