विभिन्न स्थानबाट १८ किलोभन्दा बढी गाँजासहित चारजना पक्राउ

२४ पुस, काठमाडौं । देशका विभिन्न स्थानबाट १८ किलो ३०० ग्राम गाँजासहित ४ जना पक्राउ परेका छन् । मकवानपुरको हेटौंडा उपमहानगरपालिका-४ हुप्राचौरबाट अवैध लागूऔषध गाँजा करिब ११ किलोग्रामसहित सोही उपमहानगरपालिका-८ बस्ने ४४ वर्षीया सरिता अर्याललाई   प्रहरीले पक्राउ गरेको छ । वडा प्रहरी कार्यालय टौडाबाट खटिएको प्रहरीले बागमती प्रदेश ०३-००५ प ६२३० नम्बरको स्कुटरमा सवार उनलाई उक्त गाँजासहित पक्राउ गरेको   हो । 

उदयपुरको बेलका नगरपालिका-८ कोठुबाट अवैध लागूऔषध गाँजा करिब ६ किलो र नगद ५ लाख २० हजार ५ सय रूपैयाँसहित २ जनालाई पक्राउ गरेको छ । पक्राउ पर्नेहरूमा सोही नगरपालिका(३ बस्ने २१ वर्षीय पदम बहादुर तामाङ र सोही नगरपालिका-९ बस्ने २८ वर्षीय बम बहादुर राई रहेका छन् । प्रहरी चेकपोष्ट कोठुबाट खटिएको प्रहरीले उनीहरूलाई उक्त गाँजा र नगदसहित पक्राउ गरेको हो । 

ललितपुरको गोदावरी नगरपालिका-१० प्याङगाउँबाट अवैध लागूऔषध गाँजा १ किलो ३ सय ग्रामसहित कोन्ज्योसोम गाउँपालिका-५ भारदेउ बस्ने २८ वर्षीय राम तामाङलाई  प्रहरीले पक्राउ गरेको छ । प्रहरी वृत्त चापागाउँबाट खटिएको प्रहरीले उनलाई उक्त गाँजासहित पक्राउ गरेको हो ।