खनालको राजीनामा स्वीकृत, प्राधिकरण सदस्य अधिकारीलाई कार्यवाहक अध्यक्षको जिम्मेवारी दिने निर्णय

२४ पुस, काठमाडौं । सरकारले नेपाल दूरसञ्चार प्राधिकरणका अध्यक्ष पुरुषोत्तम खनालले पदबाट दिएको राजीनामा स्वीकृत गरेको छ । आज बसेको मन्त्रिपरिषदको बैठकले उनको राजीनामा पछि रिक्त अध्यक्ष पदमा नियुक्तिका लागि सिफारिस गर्न सञ्चार मन्त्रालयको सचिवको संयोजकत्वमा समिति गठन गर्ने र तत्कालका लागि प्राधिकरण सदस्य नवराज अधिकारीलाई कार्यवाहक अध्यक्ष तोक्ने निर्णय गरेको छ । 

यस्तै राष्ट्रिय विकास परिषदमा नेपाल सरकार मनोनयन हुने विभिन्न जिल्ला समन्वय समिति, स्थानीय तह,  विभिन्न पदाधिकारी व्यक्तिहरूबाट २५ जना सदस्यहरूको मनोनयन गर्ने निर्णय पनि मन्त्रिपरिषदले गरेको छ । 

यस्तै मन्त्रिपरिषदबाट विभिन्न मितिमा सहिद घोषणा भएका र विवरण फरक परेका सहिदहरुकाे विवरण सच्चाउने, नेपाल राजपत्रमा छुट भएका सहिदहरुको नाम प्रकाशित गर्ने र थप केहीलाई सहिद घोषणा गर्ने निर्णय पनि भएको छ । 

डेडिकेटेड र ट्रंक लाइन महसुल विवाद छानविन गरि प्रतिवेदन पेश गर्न पूर्वन्यायाधीश गिरिशचन्द लालको नेतृत्वमा उद्योग र उर्जा सहसचिव रहेको तीन सदस्य समिति गठन गर्ने र अहिलेलाई उद्योगहरूको काटिएको विधुतलाई जोड्न निर्देशन दिने मन्त्रिपरिषदले निर्णय गरेको हो ।