केक तथा कुकिजमा गाँजा मिसाई बिक्री वितरण गर्ने २ जना पक्राउ

२५ पुस, काठमाडौं । केक तथा कुकिजमा लागूऔषध गाँजा मिसाउने २ जनालाई लागूऔषध नियन्त्रण ब्यूरोले पक्राउ गरेको छ । इन्स्टाग्राममार्फत स्विट बेकरी एनपी नामक एकाउन्ट बनाई अवैध रुपमा लागूऔषध गाँजा प्रयोग गरी केक र कुकिज बिक्री वितरण गर्ने २ जनालाई ब्यूरोले पक्राउ गरेको हो ।

काठमाडौं महानगरपालिका वडा नम्बर १७ सोह्रखुट्टे बस्ने २६ वर्षीय मोहमद फाजिल र काठमाडौं जिल्ला दक्षिणकाली नगरपालिका वडा नम्बर ३ स्थायी घर भई हाल ललितपुर महानगरपालिका वडा नम्बर १३ बस्ने २७ वर्षीय शालोम सादा लेप्चा जैसी पक्राउ परेका हुन् । 

एकान्तकुनामा घर भाडामा लिई प्रयोग गर्दै आइरहेको कोठाको खानतलासी गर्दा १ किलोग्राम १ सय ग्राम गाँजा, डाँठसहितको गाँजा १ किलो ५६८ ग्राम, बिक्री गर्न तयारी अवस्थाको १ केजी ९ सय ग्राम केक, माइक्रोओभन १ थान, तयारी अवस्थाको ९ सय ग्राम बटर, १ केजी ३२४ ग्राम तयारी कुकिज, डिजिटल तराजु १ थान, बेकिङ् पाउडर, चक्लेटको फ्लेभर लगायतका सामग्री बरामद गरिएको ब्यूरोका सूचना अधिकारी प्रहरी उपरीक्षक चक्रराज जोशीले जानकारी दिए । 

उनीहरू विरुद्ध लागुऔषध नियन्त्रण ऐन २०३३ बमोजिम आवश्यक अनुसन्धान भइरहेको प्रहरी उपरीक्षक जोशीले बताए ।