सहाराको ‘एक मुठ्ठी बादल’को पोस्टर सार्वजनिक

२६ पुस, काठमाडौं । सहारा शर्माको निर्देशनमा फिल्म ‘एक मुठ्ठी बादल’ बन्ने भएको छ । आँचल शर्मा र सहयोगराज अधिकारीलाई शीर्ष भूमिकामा लिएर सहारा शर्माले फिल्म ‘एक मुठ्ठी बादल’ निर्देशन गर्ने भएकी छन् । बिहीबार फिल्म घोषणा गर्दै पोस्टर सार्वजनिक गरिएको छ ।

‘इन्द्रेणी खोज्दै जाँदा’पछि सहाराको यो दोस्रो कथानक फिल्म हो । फेमिली ड्रामा जनरामा बन्ने फिल्मले केही अप्रत्यासित, दुर्भाग्यपूर्ण घटनापछि एउटी आमा र उनको परिवार वर्षौंदेखिको रहस्य र कुन्ठा सामना गर्न बाध्य हुने कथावस्तु पेश गर्छ । फेब्रुअरी वा मार्चदेखि पोखरा उपत्यकामा फिल्म सुटिङ हुने छ । पारिवारिक र महिला प्रधान कथावस्तुमा फिल्म बन्ने जनाइएको छ ।

फिल्मको पटकथा सहाराले नै लेखेकी हुन् । यो फिल्मले यसअघि विश्वप्रसिद्ध महोत्सवको फिल्म बजारमा पिचिङ र ल्याबमा छनोट भइसकेको छ । लोकार्नोको आपेनडोर्स, कान्स र रोटेरडम फिल्म मार्केटमा फिल्म पिचिङ भइसकेको छ ।

आउँदो जनवरीमा ढाका फिल्म फेस्टिभलको मार्केट र ल्याबमा फिल्म पेश हुँदैछ । फिल्मको पटकथा सहारा स्वयंले लेखेकी हुन् । कास्टिङको हिसाबले सहयोगराजको यो डेब्यु फिल्म हुनेछ । उनी टेलिभिजनको पृष्ठभूमिबाट फिल्ममा आएका हुन् । गौंथली इन्टरटेनमेन्ट र अन्डरग्राउण्ड टकिजले निर्माणमा सहकार्य गरेका छन् ।