चिसो बढेसँगै सिरहाको जनजीवन प्रभावित, सार्वजनिक स्थलहरुमा चहलपहल कम

♦ मुकेश कुमार यादव

२६ पुस, सिरहा। तराईमा पछिल्लो एक सातादेखि चिसो बढेपछि जनजीवन कष्टकर बन्दै गइरहेको छ। कुहिरोसँगै लागातारको हावा र शीतलहरले चिसो बढेपछि सिरहासहित मधेश प्रदेशको जनजीवन कष्टकर बन्दै गएको हो। 

चिसोका कारण जिल्लाका सम्पूर्ण सामुदायिक विद्यालयहरू बन्द रहेका छन्। चिसोले गर्दा हाटबजार, सार्वजनिक स्थलहरूमा चहलपहल कम भएको छ। 

चिसोका कारण बालबालिका, वृद्धवृद्धा, दम, मुटुरोगीलगायत बढी प्रभावित भएका चिकित्सकहरु बताउँछन्। चिकित्सकहरुले यस्तो समयमा न्यानो कपडा लगाउने, अनावश्यक घरबाहिर नजाने र तातो र झोलिलो खानेकुरा खान सुझाएका छन् । 

चिसो बढेपछि सिरहाको गोलबजार नगरपालिका र इलाका प्रहरी कार्यालयले चोक तथा सार्वजनिक स्थानहरुमा आगो ताप्नको लागि दाउरा वितरण गरेको छ।  अहिले तराईको अधिकांश भू-भागहरुमा हुस्सु तथा शीतलहरको अवस्था रहेको  छ।